Antis d’escomencipiar o partiu se guardó un minuto de silencio por as victimas d’o accident d’Adamuz y por Lucien Müller, exentrenador d’os dos equips. Tal yera l’airera que un tablero fotió un trucazo a un espectador que calió asistencia medica. O Castellón i plegaba como dició Sellés como l’equip mas en forma d’a categoría y bien que lo contrimostró dende o escomencipio d’o partiu. A primera chugada estió una internada de Guti que no trobó rematador y astí se remató o bagache ofensivo local en a primera parti. O Castellón u bien trobaba espacios a l’espalda d’a esfensa u bien moveba a pilota con rapidez y precisión. Tamién veyió una pilota a o palo y como se le anulaba un gol dimpués d’un corner por falta. L’arbitro tenió o rigor que no’n tenió con o criterio con as tarchetas. Bi heba un chaparrazo meteorolochico y en o chuego. O Reyal Zaragoza patió y fació un poder por mantener l’empace en o marcador.

Sellés reaccionó bien tras o descanso y fació tres cambios. Tachi refirmó a esfensa, Juan Sebastián chugó de lateral a garra cambiada y Francho baixó a o lateral dreito con una esfensa de cinco. Tanimentres que buscó a velocidat de Cuenca pa sosprender a o Castellón a o contraataque. Con ixa nueva disposición aturó muito millor os ataques foranos, que facioron poco periglo en a segunda parti. Tampoco no bi pleveba.

Y antimás tenió dos buenas ocasions de poder poner un gol. Una d’ellas tras un gran saque d’Andrada. 

Sellés veyió dificil ganar y tiró de pragmatismo pa no perder y tornar a sumar. Nomás s’ha perdiu dos d’os zaguers diez partius y puede estar un punto valioso a la fin d’a temporada. Cal dicir que en os zaguers dos partius s’ha trobau a faltar a buena salida de pilota que bi heba dende que bi plegó Sellés. Y o meyocampo da sintomas de cansera y pareix menester reforzar-lo. Dani Gómez tornó a chugar y aportó movilidat a l’ataque. Bi habió dos posibles tarchetas royas a o Castellón por accions sin pilota sobre Tachi. Pero estió Cuenca o forachitau en o rafe d’o descuento por una dentrada por dezaga an queda a dubda sobre o contacto. Pero no bi habió tiempo pa mas.

Andrada: Bien. Bien con os pies y as mans.

Gomes: Suspenso. Superau por Cipenga, partiu pa aprender.

Insua: Bien. Firme.

Saidu: Bien. Tornó a o suyo libel.

Tasende: Suspenso. Con problemas y tarcheta innecesaria.

Raúl Guti: Aprebau. Sacrificau

Keidi Bare: Aprebau. Prebó de plegar a muitos puestos.

Francho: Aprebau. Polivalencia

Toni Moya: Bien. O mas entonau d’o meyocampo.

Valery: Suspenso. Gris.

Kenan Kodro: Aprebau. Baralló tot lo que podió.

Juan Sebastián: Aprebau. Intenso y condicionau por una temprana tarcheta.

Tachi: Bien. Seguro.

Cuenca: Aprebau. Buscó sosprender a la contra.

Dani Gómez: Aprebau. Buscó dar salida a os suyos companyers.

Aguirregabiria: Aprebau. Aduyó con un chugador menos.

Rubén Sellés: Bien. Sabió reaccionar y recomponer a l’equip tirando de pragmatismo. No podió fer guaire más.

Alejandro García