O Reyal Zaragoza certificó virtualment o suyo descenso a 1ª Fed. Una situación no vista en casi uitanta anyos. Bi heba bella expectación por as palabras de Francho entre semana, plenas de sentimiento zaragocista.  Pero ¿por qué sale siempre solenco? ¿por qué ha de ser siempre él qui da la cara? Simptoma d’un club sin cabeza vistera y con una directiva luen tanto en espiritu como en o puesto. Dimpués de cinco temporadas igual no puede haber atro desenlaz. Nian asinas l’equip salió furo a por a victoria. Sellés ha siu fagocitau por o buedo negro que agora ye o Reyal Zaragoza. No puestar que toz os entrenadors y directors esportivos sigan malos, y a mayor parti d’os chugadors. Muitos habendo contrimostrau buenas cosas en atros puestos. Os culpables son alto. A primera chiflada plegó en o simbolico minuto 32.

D’o partiu, poco se’n puede dicir. Un Burgos acotraciau, nomás habió d’asperar. Millor colocau en o campo, trobando siempre a o chugador libre en a salida de pilota y dondiando l’aria, ixo sí, sin ocasions claras. Chugó con os niervos y a propia incapacidat local. Y o gol plegó en un man a man en a segunda parti. D’o Reyal Zaragoza no podemos resenyar ocasions claras. Caldrá veyer os partius pa trigar qui puede continar l’atro anyo y dar minutos a os zagals.

Con a fin d’o partiu, esclató una protestas más fura enta o palco, d’una afición farta de veyer a o suyo club estricallau. O lunes s’ha confirmau os ceses de Rubén Sellés, con muita poca culpa, y de Txema Indias con una penible planificación. I torna Lalo Arantegui, en un acto de zaragocismo,  con o suyo equip de confitanza y demandando lo que cal, autonomía de raso. Mariano Aguilar no puede meter más as suyas mans en l’afer esportivo. David Navarro queda como interino a l’aspera de JIM. Y án ye Jorge Más? Celebrando o suyo aniversario redindo-se en Miami.

D’as trachedias griegas teneban con l’horror un efecto purificador y liberador. Iste club talment haiga plegau a ixo, a tornar a lo menos a estar reconocible pa la suya afición.

Andrada: Aprebau. Principal iniciador d’o chuego.

Aguirregabiria: Suspenso. Gris.

El Yamiq: Aprebau. Poca cosa más puede fer.

Gomes: Aprebau. A sumar minutos.

Larios: Aprebau. Buen libel.

Mensah: Bien. Ha d’estar titular.

Lucas Terrer: Bien. Buena movilidat.

Cuenca: Aprebau. Una mica más amortau.

Rober: Aprebau. O poco periglo prencipió en él.

Francho: Aprebau. Portavoz d’o club.

Dani Gómez: Aprebau. Fació un poder.

Cumic: Suspenso. Atolondrau.

Soberón: Suspenso. Se levó una graniza chiflada.

Tasende: Aprebau. No funcionó guaire o doble lateral.

Barrachina: Aprebau. A sumar minutos.

Kenan Kodro: Aprebau. Fació honra a suya dentrada.

Rubén Sellés: Bien. Gracias por venir-ie y por fer un poder pa salvar isto. Suerte.

Chugador d’o mes de Febrero: Mensah

Alejandro García