Antis de prencipiar o partiu, se guardó un minuto de silencio por Jesús Fraile Escudero, socio numero 2 y muerto con 105 anyos.

Pleveba en Zaragoza cuan escomencipió o partiu y talment ixe clima nortenyo chunto a un buen planteyamiento, fizo que a Real Sociedat B sosprendese a o Reyal Zaragoza con una presión adebantada que no podeba superar. Antimás de que plegaba con masiada facilidat a l’area local y remataba a portería, más muitas imprecions y errors en a salida d’a pilota, tanto por os esfensas como meyocampistas. Lo que ye a segunda división, un diya ganas en casa d’o l’ider y a o venient no puedes en casa tuya con un equip d’a zona baixa. Unos numeros en casa nuestra que son d’estar preocupau. O mesmo once que en Santander no feba honra pa chugar iste partiu. En fútbol cada partiu ye una historia diferent.

Sobre la meya hora de chuego, o Reyal Zaragoza tenió os millors minutos de chuego y s’amanó una mica más a l’area dosnostiarra. Más que más con a profundidat de Tasende y Cuenca. Por primera vez, pitaba a o Reyal Zaragoza una arbitro como principal, Marta Huerta de Aza. Estió correcta pero con a mala suerte en una chugada de peligarcero de Toni Moya, que ponió un gol de falta con o portero luen d’a portería, cuan ella yera marcando una barrera no demandada. Talment Fraga no hese estau fuera d’a portería si no veye marcar a barrera. Con tot y con ixo, o Reyal Zaragoza se iba a o descanso con una millor asperanza pa la segunda parti.

Pero continó tot como en a primera. Un Reyal Zaragoza que pareixeba falto d’enerchía y que yera superau fisicament por os dosnostiarras. Os cambios tampoco no cambiaron guaire. Y en una chugada de falta cheneral d’atención, Carrera poneba o primer gol dimpués de trobar un pasadizo libre por o carril central. Yera menester a lo menos no perder un partiu con un rival dreito por a permanencia y l’equip sacó argüello. Kodro estampaba atro remate en o palo y Bakis teneba atro man a man. Paul Akoukou, que tornaba a chugar, ponió o gol de l’empace en una falta sacada por Tasende y bien forzada por Valery. Talment Paul pueda estar uno d’os refuerzos que cal. Manimenos, a Reyal Sociedat B atacó más en o descuento. Bien se vale que o Reyal Zaragoza en podió sacar un punto.

Andrada: Bien. Tenió treballo que resolvió bien pero ponió a toda la grada niervuda con a suya salida de pilota.

Gomes: Aprebau. Contina asentando-se.

Insua: Bien. Calió adubir prou.

Saidu: Suspenso. Inseguro y no salió bien con a pilota como a ormino.

Tasende: Bien. Contina en buen inte de forma.

Keidi Bare: Suspenso. Impreciso con a pilota.

Raúl Guti: Aprebau. Lo prebó con más ganas que encierto.

Francho: Aprebau. Siempre fa un poder.

Toni Moya: Aprebau. Estió tapau y participó poco.

Cuenca: Bien. Con profundidat dica que le permitió o fisico.

Kenan Kodro: Aprebau. Treballó una mica solenco y casi pone un gol.

Paul Akoukou: Bien. Tornó a chugar y prebó d’aduyar a o meyocampo. Ponió un gol.

Valery: Aprebau. Alternó buenas y malas accions.

Tachi: Aprebau. Atro que tornaba a chugar.

Bakis: Suspenso. No dentró bien y falló una buena ocasión.

Moyano: Aprebau. Salió a la desesperada y estió participativo.

Rubén Sellés: Aprebau. Por un mal partiu no puede ser suspenso con tot lo que ye fendo.

Alejandro García