O Reyal Zargaoza fació o millor partiu d’a temporada cuan más caleba. Y en casa d’o lider a qui encara podió fer-le una goleada. O planteyamiento de Sellés rozó a perfección, conoixendo de raso como fer-le mal a un equip que apreta muito en O Sardinero. Con un once esviellau y con mas fisico y dinamismo. Orden y rasmia en esfensa, an sobresalioron Saidu y Gomes, que opositan a fer-se fixos en l’once titular. Y salir a escape a o contraataque buscando as bandas, con movimientos muito bien entrenaus y automatizaus. Asinas plegó o primer gol, puyada de Gomes dende o lateral dreito, remate de Guti y Kodro aproveita o rechace pa poner de primeras o gol. En iste caso, Gorka Etayo encertó dixando seguir a chugada, dando bien a lei d’aventalla.  Sellés dio confianza a Kodro dimpués d’a error contra Las Palmas y respondió con un hat-trick. Tot a o primer toque. Como o segundo gol a un buen centro de Francho atra vez dende a dreita. O Racing  dondiaba l’area zaragocisra pero sin guaire periglo, fueras de una ocasión muito clara de Iñigo Vicente en o rafe d’o descanso.

L’anglucia con Sellés se veye en o cambeo obligau de Keidi Bare en o descanso, dentrando un debantero como Soberón y no pas un chugador esfensivo. Mensache de que cal ir a poner o tercer gol. Tasende, con calma y clase, centró y Kodro fació una polida volea a la escuadra pa poner o tercer gol y celebrar-lo con l’afición desplazada a Santander. Y bien que’n podió plegar o cuarteno. Cuenca no pasó a Soberón en l’area y Francho no centró bien en atro contraataque.

Tanimentres Sellés heba de fer cambios por problemas fisicos en a esfensa, con Gomes, Insua y Tasende, cosa que l’equip notó. Con tot y con ixo no pareixeba periglar a victoria, pero futbol ye futbol. Puerta poneba un gol dimpués d’un corner y más que más Bakis perdonó o cuarteno dimpués d’un present de Francho en un man a man, y pa forro i bota, Soberón yera forachitau con tarcheta roya dreita en o corner. Astí o Racing se venió entadebant y se lo creyó con o 2-3 de Manex Lozano. O descuento pareixeba interminable pero remató con una más que chusta victoria zaragocista. A labor de Sellés ye sobrebuena.

Andrada: Aprebau. Tornó a tirar de veteranía.

Gomes: Notable. Chugó como un veterano.

Insua: Bien. Se nota a suya veteranía.

Saidu: Notable. Exuberant como central.

Tasende: Notable. Brilla en ataque.

Keidi Bare: Bien. Sostiene a l’equip.

Raúl Guti: Notable. Bien en a distribución y plegando a portería.

Toni Moya; Bien. Partiu serioso.

Francho: Sobresalient. No se cansó de correr y asistir.

Cuenca: Bien. Vertical, ha d’amirrollar a toma de decisions.

Kenan Kodro: Sobresalient. Hat-trick.

Soberón: Aprebau. No lo fació mal dica l’expulsión.

Bakis: Aprebau. Sin encierto.

Radovanovic: Bien. Estió firme.

Juan Sebastián: Aprebau. No le teneba facil cuan salió.

Pomares: Aprebau. Patió una mica por l’inte d’o partiu.

Rubén Sellés: Sobresalient. Sobrebueno planteyamiento y mentalidat de l’equip.

Alejandro García