As Palmas salió como lo que ye, un aspirant a puyar. Movendo a pilota con criterio y rapidez, cuasi siempre os chugadors locals plegaban tardi. Se trobaba a faltar una mica de rasmia e intensidat. Asinas, Jesé poneba o primer gol dimpués d’una perdua en o meyocampo y a Andrada se le escorre-se a pilota.  Dimpués en tenió atro anulau por fuera de chuego. No plegó guaire a l’aria pero siempre con periglo. Con o exzaragocista Luis García como tecnico. En una tardi muito freda y menos publico que a ormino, As Palmas deixaba encara mas fredor a l’afición local.

Pero en a segunda parti, tot cambió de raso, yera o Reyal Zaragoza qui plegaba con intención a l’aria. Con muita más intensidat fue metendo dezaga a As Palmas. Y luego plegaría l’empace con Kodro, en o segundo intento dimpués d’un present de Tasende. L’equip contrimostró anglucia y continó terne que terne buscando o segundo gol. Y tenió dos ocasions muito claras. Saidu fació una chugada sobrebuena como extremo pero Valery no le dio buena rosca a la pilota solenco en l’aria. Y Marcos Cuenca fació lo mesmo con Kodro que se enreligó y no podió rematar.

Asinas que o dominio d’as arias y a diferencia de calidat, decantoron o partiu con o gol de Estanis Pedrola. Fichache d’hibierno canario y de los que ye menester trayer en iste mercau. Con Sellés, l’equip siempre compite, pero no ye prou debant d’istos equips. Tampoco no se tenió suerte y Saidu estampó un remate de capeza en o palo. Pero no podemos charrar nomás de mala suerte en ista redota.

Andrada: Aprebau. Con menos encierto que en atros partius.

Juan Sebastián: Aprebau. China-chana se va asolando. Cumple.

Tachi: Suspenso. Una mica accelerau.

Radovanovic: Aprebau. Tot punt d’honor y compromís con mal en a costiella.

Tasende: Bien. Da profundidat en ataque.

Keidi Bare: Bien. Prebó de sostener o meyocampo, una mica solenco.

Raúl Guti: Aprebau. Prebó d’estar en masiaus puestos.

Francho: Aprebau. Buena actividat tornando a l’equip.

Soberón: Aprebau. Aduyó en a chugada de l’empace pero contina negau.

Valery: Aprebau. De menos a más. Aduyó prou en esfensa a Tasende.

Kenan Kodro: Aprebau. Cara y cruz.

Toni Moya: Aprebau. Aduyó en a distribución d’o chuego.

Cuenca: Bien. Muito vertical por a banda.

Saidu: Bien. Enerchía y aportación en ataque.

Bakis: Aprebau. Ponió ganas pero con poco tiempo.

Rubén Sellés: Bien. L’equip compitió y reaccionó bien ante un equip superior. Bi ha cosas que no puede controlar.

Chugador d’o mes d’Aviento: Keidi Bare

Alejandro García