Bi heba ambient pre nadal en a grada, con chent con gorros azuls. Pero a tronca de nadal no cagó cosa pa o Reyal Zaragoza. Antis de prencipiar, se guardó un minuto de silencio en memoria de Manolo Villanova.

Un partiu gris y que ya prencipió de antis torciu con a lesión de Francho en o calentamiento. Manimenos, escomencipió bien metendo a o Cádiz en a suya área. Aguirregabiria se lesionó en o minuto 6 y a banda dreita que heba carburau tan bien en os zaguers partius se quedó sin referencias, lo que aproveitó o Cádiz pa cargar o suyo ataque por ixa banda. Si a circulación de pilota estió prou bien en ixos partius, se trobó a faltar a Andrada como primer pase y a Francho. Moussa manulló o meyocampo y o Cádiz yera comodo. O que s’asperaba d’Akoukou, dimpués d’os primers partius, nian yera en a convocatoria. Tampoco no o Cádiz plegaba con guaire periglo, pero Adrián habió d’intervenir dos veces con encierto.  O Reyal Zaragoza aguantó y se podeba asperar una milloría como en Malaga dimpués d’o descanso. Pero teneba debant un Cádiz muito bien plantau. Nomás Moyano tenió desborde y creyó bel periglo.

A segunda parti prencipió con bella aproximación zaragocista, más que más un remate de capeza de Radovanovic, qui en a chugada venient ponió un autogol. O Reyal Zaragoza continaba con problemas pa tener a pilota en campo contrario y Sellés prebó una novedosa zaga con tres centrals, dando o peso ofensivo a os laterals, Tasende que heba dentrau, y Juán Sebastián. Pero Moussa, o millor d’o partiu, poneba un gran gol dende fuera de l’área. L’equip contrimostró rasmia y con más corazón que no chuego, lo continó prebando, y Tachi poneba un gran gol de tixera. A dentrada de Dani Gómez tamién heba revilcau una mica l’ataque. O Cádiz tiró de l’atro fútbol y aturó tot lo que podió o partiu. Adrián mantenió a l’equip en o partiu aturando un penalti, que alticamó a o publico por no estar más claro que una acción con Insua con empace a cero. Bi habió bella oportunidat pero a la fin, no se puede dicir que estase inchusta a victoría forana. Fa servir pa veyer que caldrá fer un poder gran pa salir d’o descenso y que tamién ye menester refuerzos en o mercau hibernal. Bi ha chugadors que pueden liberar masa salarial y que no son alportando.

Adrián Rodríguez: Bien. No podió fer cosa en os gols y aturó un penalty.

Aguirregabiria: Sin calificar. Lesionau.

Insua: Aprebau. Tenió treballo.

Radovanovic: Aprebau. Sin suerte.

Pomares: Suspenso. Mal partiu.

Keidi Bare: Aprebau. Lo prebó pero no podió manullar o meyocampo.

Raúl Guti: Aprebau. Le costó embastar chuego.

Sebas Moyano: Bien. Unico d’ataque que creyó periglo.

Valery: Suspenso. Se le puede demandar más.

Soberón: Suspenso. Lento.

Kenan Kodro: Suspenso. Poca presencia.

Juán Sebastián: Aprebau. Se fue entonando.

Tasende: Bien. Va gritando a la titularidat.

Tachi: Bien. Dinamico y con gol. Tamién demanda titularidat.

Toni Moya: Aprebau. Tampoco no trobó buedos en a esfensa gaditana.

Dani Gómez: Bien. Creyó más periglo que os suyos dos companyers, tamién demanda titularidat.

Rubén Sellés: Aprebau. Equip espeso, prebó una solución de tres centrals con poco más en a cadiera. No sacó sincusas.

Alejandro García