O sindicato SOA ha denunciato publicament as vulneracions de ro Alcuerdo de 29 de chunyo de 2006 que se son producindo en cuantos Colechios Rurals Agrupatos (CRA) de ra provincia de Uesca, afectando a ro profesorato itinerant.

Seguntes o sindicato, ras Instruccions d’Inicio de Curso son estando utilizatas pa modificar de forma unilateral as condicions laborals d’estos docents, mas que mas en o computo de desplazamientos, reduccions horarias y compensacions economicas, bela cosa que no ye contemplata en l’alcuerdo vichent.

SOA alerta que en bel CRA s’obliga a realizar es desplazamientos dentro de ras horas complementarias, reducindo o tiempo real destinato a programacions, coordinación y preparación de clases. Amás, se son eliminando kilometros reals recorritos alegando criterios arbitrarios, como ra distancia a ro domicilio de ro docent, y suprimindo puntos de referencia sin pasar por a Comisión de Seguimiento, tal como exichen as propias instruccions.

Estas practicas, que no s’aplican de forma uniforme en Aragón, son provocando un agrevio comparativo entre docents y territorios y una perda efectiva de dreitos laborals, incluyindo ra reducción de ras horas de compensación por itinerancia.

Debant d’esta situación, SOA considera que existen motivos prou pa convocar una vaca. O sindicato exiche l’aplicación integra de ro Alcuerdo de 2006, a corrección immediata d’estos criterios restrictivos y ra convocatoria urchent de ra Comisión de Seguimiento. En caso contrario, anuncia que impulsará mobilizacions y una vaca educativa real en defensa de ro profesorato itinerant y de ra escuela rural.

Ampliar información aquí.