O Reyal Zaragoza alarga a suya buena dinamica con un empace en Malaga, fendo 10 de 12 puntos y quedando a dos d’a salvación. Con un Sellés que repetió once. No prencipió o partiu tan bien como en os atros.  Incomodo por a presión local, muito dencima en as chugadas y que se levaba cuasi toz os rechaces. Con tot y con ixo, o gol local plegó con una mica de suerte en una chugada a pilota aturada que chiró Einar Galilea.

China chana, o Reyal Zaragoza fue amillorando. Más que más con lo que más a amillorau dende que i plegó Rubén Sellés, a salida y circulación de pilota. Encara tomando risque, bi ha confitanza pa fer-lo. Keidi Bare y Guti prencipioron a dirichir o partiu. Con Andrada como punto d’escomencipio d’a chugada. Tamién cal citar buenos cambios de chuego de Tachi en pilota luenga en a segunda parti. Ista vez, os cambios facioron honra buscando más profundidat.

O Malaga pagaba que heba feito un poder gran en lo fisico y ya no podeba esfender como antis, china chana cada vez más amán d’a suya area. Soberón por dos veces podió empazar. Toni Moya dio unos buenos minutos y en un gran pase dixó a Dani Gómez en un man a man, Alfonso Herrero la sacó cuan ya pareixeba superau. Dani Gómez tornó a l’equip y fació honra. Andrada sacó atra buena man a un tiro de Niño que s’enverenó. Un penalti una mica inocent de Recio, sirvió pa meter l’empace a Dani Gómez en o descuento.

O Malaga encara podió ganar, pero lo evitó Andrada, tamién tirando de veteranía. Con una fin de partiu niervudo y amago de barafundio. O Reyal Zaragoza en torna con un buen punto y contina a suya escalada. O mensache de Sellés contina estando d’exichencia.

Andrada: Bien. Intervinió con encierto y veteranía.

Aguirregabiria: Aprebau. Más enfaigau en esfensa.

Insua: Bien. Se protechió bien con tarcheta y provocó un penalty.

Radovanovic: Aprebau. Patió una mica.

Pomares: Aprebau. Con oficio.

Keidi Bare: Notable. Manulló o meyocampo.

Raúl Guti: Bien. Buena labor de construyir chuego.

Francho: Bien. Lo prebó por banda dreita.

Valery: Aprebau. De más a menos.

Soberón: Aprebau. Contina negau cara a gol.

Kenan Kodro: Aprebau. Buen treballo.

Tachi: Bien. A la suya contundencia, adhibió buen chuego con a pilota.

Tasende: Aprebau. Dio profundidat por a banda cucha.

Cuenca: Bien. Con desborde.

Toni Moya: Bien. Cumplió con a misión de filtrar pilotas.

Dani Gómez: Bien. Tornó a l’equip ponendo un gol.

Rubén Sellés: Bien. Sabió reaccionar a un escomencipio que no estió bueno y encertó con os cambios.

Alejandro García