O Reyal Zaragoza ganó o suyo primer partido en l’Ibercaja estadio y asinas Sellés tamién obtenió a suya primer victoria como entrenador zaragocista. Mereixida por o suyo treballo iste mes y porque ista semana ha feito un poder en recuperar mentalment a la plantilla. Con a novedat de Guti más enta zaga creyando chuego y dos debanters. Os primers quince minutos estioron de raso de dominio local, con tres corners en cinco minutos y bellas ocasions. Sosprendió a falta d’intensidat en o escomencipio oscense. Dica que Aguirregabiria ponió un golazo de volea dende difuera de l’area en a misma escuadra.

Allora o Uesca pasó por primera vez d’o meyocampo con posibilidatz de atacar y china chana fue igualando o partiu pero sin plegar a creyar ocasions claras. O Reyal Zaragoza asperó más dezaga a o suyo rival pero prebando de adebantar a linea d’esfensa cuan yera posible y no repetir os errors de Granada. Keidi Bare y Guti manulloron o meyocampo dica que o fisico les permitió. Valery tamién mandó l’ataque zaragocista en a primera parti. Tanimentras que a S.E Uesca trobó a faltar a Sielva.

En a segunda parti continó a emoción por o resultau. En un partiu chugau con esportividat. Nomás cal refusar bell canto contra Pulido d’un sector d’a grada. No bi habió guaire ocasions. Nomás a S.E Uesca tenió varias chugadas de contino en tres minutos. Pero no tien en a debantera a calidat d’atros anyos. En o Reyal Zaragoza toz treballoron en chunto pa en esfender una victoria que puestar muito important. A lo menos ye un primer trango y creba a racha de redotas. Por contra, a S.E Uesca contina la suya dinamica y caye a descenso. Bolo tamién i tien muito treballo.

Sellés tardó en fer cambios, con un equip que se le veyeba canso. Talment remerando os partius anteriors aon no heban feito honra. En a SE Uesca amilloró una mica l’ataque pero no prou. Radovanovic veyió a segunda tarcheta amariella en os zaguers minutos y a S.E Uesca veyió a posibilidat de poner un gol como en atros partius a la fin. Allora l’ambient aduyó a o Reyal Zaragoza a mantener a victoria y a la fin ricordó a La Romareda. Ganó qui más lo buscó y qui más intensidat metió. Pero os dos tienen muito treballo pa salir d’o descenso.

Andrada: Bien. Ista vez estió seguro.

Aguirregabiria: Sobresalient. Fació casi tot bien y ponió un golazo.

Insua: Aprebau. Tornó a fer-lo bien.

Radovanovic: Aprebau. Masiau impetu.

Pomares: Aprebau. Una mica irregular.

Keidi Bare: Bien. Dio criterio a o meyocampo.

Raúl Guti: Bien. Bien como meyocampista creyativo.

Francho: Bien. Incansable y con profundidat.

Valery: Bien. Se pareixió a o chugador que s’aspera.

Soberón: Aprebau. Bien en ataque no tanto en esfensa.

Kenan Kodro: Aprebau. Treballo sacrificau.

Saidu: Aprebau. Dio enerchía.

Bakis: Aprebau. Buena actitut.

Toni Moya: Aprebau. Aduyó en o meyocampo.

Tasende: Aprebau. Tornó a ser doble lateral.

Sebas Moyano: Aprebau. Salió enchegau.

Rubén Sellés: Notable. Buen planteyamiento y más que más a recuperación mental de l’equip.

Dani Jiménez: Aprebau. No podió fer cosa en o gol.

Carrillo: Suspenso. Patió con Valery.

Pulido: Bien. Contrimostró veteranía y saber estar.

Piña. Aprebau. Discreto.

Julio Alonso: Suspenso. Patió en a suya banda.

Sielva: Suspenso. No podió en o meyocampo.

Dani Luna: Aprebau. Lo prebó en ataque.

Kortajarena: Aprebau. Más ganas que no encierto.

Portillo: Aprebau. Se topó con Aguirregabiria.

Sergi Enrich: Aprebau. Treballó.

Enol: Bien. Enchegó l’ataque.

Dani Ojeda: Aprebau. Lo prebó dende a banda.

Ángel Pérez: Bien. Dio profundidat.

Ntamack: Aprebau. Forzó una expulsión.

Jon Perez Bolo: Aprebau. Buen analisi en rueda de prensa, tien muito treballo.

Alejandro García