Siempre ye una buena noticia a  naixencia d’un colectivo que faiga servir l’aragonés. Esta ocasión ye o grupo de mosica Radices.

As suyas y suyos components, de Uesca, prencipian un camín conchunto en un grupo que clama a lo que fa como rock d’alpargata.

Rock and roll con un mezclallo de sonius de gaita, cenyos a o folklore d’o país y letras en castellano y aragonés que cuentan sobre tot historias en primera persona en femenino (crebando a norma).

Chulia Sierra (guitarra), Ana Puey (saxo y chuflainas) y Sofía Comín (baixo), Rubén Correia (batería) y Lorién Sierra (guitarra y voz) fan este grupo pa contar historias dende a radiz d’o territorio y pa dar un chicot empentón a que se sienta la luenga en os rez, en os festivals y en os bars.

O suyo debut i será a l’atro dominche en Uesca a las 18h, en un concierto homenache a Carlos Luna Sistac, mosico d’a ciudat feneixiu fa 6 anyos. Tot ixo meso en a fiesta d’o barrio Sant Martín.

Fa ya una semana, facioron un chicot prestreno en o Juan Sebastián Bar, de Uesca en do habioron de meter o letrero d’aforo pleno en a puerta.

Ninviarán tamién ixe cabo de semana una campanya de Crowdfunding pa financiar o suyo primer disco que será grabau de cara a l’atro verano.