L’angunia que prencipió en 2006 fa camín pa levar a o Reyal Zaragoza fuera d’o fútbol profesional. Quinta redota consecutiva. En un partiu an no estió inferior a o Dépor pero que se resolvió por a mayor calidat gallega.

En primeras, homenache a Elena Cuesta, incondicional zaragocista, y a Jorge Casado.

A suya familia y companyers de l’equip cadet salioron a o centro d’o campo entre aplausos. Un minuto de silencio que emocionó a tot l’estadio.

Antis d’o partiu bi habió una protesta contra a chestión d’a directiva y parti de l’estadio lo abandonó en os primers diez minutos. Chunto a una protesta cheneralizada en o minuto 32.

O Dépor prencipió mandando y tenió mesmo tres ocasions. China-chana o Reyal Zaragoza fue igualando o partiu. Y Toni Moya podió ubrir o marcador en un man a man. Rubén Sellés fació prou con lo que teneba, mermau en defensa y meyocampo. Engueró Alejandro Gomes, que tornó a deixar una bueniza impresión con 17 anyos. Sellés no feba burro falso cuan dició confiar con os chovens.

A segunda parti la prencipió prou bien o Reyal Zaragoza, pero cuan millor yera, plegó una discutida falta y Mario Soriano poneba a pilota en a escuadra. A o Reyal Zaragoza le pesó o gol y l’aspecto fisico, sin cambios pa o meyocampo. Como en Xixón, os cambios no aportoron guaire. L’amilloranza sisquiera da pa poner un gol.

Poco dimpués, Yeremay apercazaba pilota en campo propio, emprendeba enta a linia de fundo y asistiba con un taconazo a Mella pa o segundo gol, en semifallo. Astí se remató o partiu y o Dépor prencipió a chugar como uella en ferraina. O Zaragoza contina en un pozo que pareix no tener fundo.

Adrián Rodríguez: Aprebau. Sin culpa en os gols.
Aguirregabiria: Aprebau. Cumplidor.
Insua: Aprebau. Con o tozuelo embendau.
Gomes: Bien. Enguerada con nota.
Pomares: Aprebau. Oficio.
Toni Moya: Suspenso. Sin encierto.
Francho: Aprebau. Fació un poder.
Raúl Guti: Aprebau. Sacrificau.
Cuenca: Aprebau. Activa dica a lesión.
Valery: Aprebau. Pocas opcions de desbordar.
Soberón: Aprebau. Lo prebó tot o tiempo.

Pau Sans: Aprebau. Una mica acelerau.
Kenan Kodro: Suspenso. Poca participación.
Bazdar: Aprebau. Prebó filtrar bel pase.
Paulino: Sin calificar.
Juan Sebastián: Sin calificar.

Rubén Sellés: Bien. Fació prou con os vimbres que teneba. L’equip compite.
Chugador d’o mes d’Octubre: Soberón

Alejandro García