En primeras, comentar a trachica noticia d’a muerte de Jorge Casado, chugador d’o cadete A y socio. Que a tierra le siga leu.

Rubén Sellés teneba una difícil enguerada en Xixón, con un Sporting que heba ganau os dos partius con Borja Jiménez. Se veyió un Zaragoza con más rasmia e intensidat que en os partius anteriors. Antimás d’una ideya de chuego parellana a la que avanzó en a suya presentación, orden en esfensa y verticalidat cuan se recupera a pilota. Sin abusar d’a pilota luenga . Un 4-2-3-1 prebando d’estar equilibrau y con Guti como meyapunta y Tachi en o meyocampo como principals novedaz tacticas.

O Reyal Zaragoza plegaba fácil a l’area y Guti tenió una buena ocasión. Un escomencipio esperanzador que se crebó con o gol de Otero con o tozuelo dimpués d’un corner, remató solenco o goleador local. Ixe tozolón esturdió unos minutos a o Reyal Zaragoza, y o Sporting podió poner o segundo gol pero se trobó con Adrián Rodríguez que tornaba a la portería. Y a verdat estió que o Reyal Zaragoza remató prou bien a primera parti, metendo a o Sporting en a suya area, cosa que tampoco no ye rariza en os equips de Borja Jiménez. Francho podió empazar dimpués d´una buena chugada colectiva. Antimás o VAR avisaba a Cid Camacho d’una agresión de Dubasin a Pomares, que veyió a tarcheta roya. Pa rematar bi habió polemica con un gol anulau por falta a Soberón ¿empentón a o esfensa u falta a o portero?

Con tot y con ixo, o Reyal Zaragoza no sabió chugar guaire bien en superioridat. O Sporting s’esfendió bien y tamién aturó o partiu. Nomás Cuenca tenió una buena ocasión de poner gol. Os cambios tampoco no aduyoron guaire a dar aire a l’equip. Kodro no recullió balons pa rematar. Y Bazdar y Pinilla, con buena visión de pase, no chugoron. Ni Tasende, con más capacidat en ataque que no Pomares. Tampoco no en os dieciseis corners se podió fer cosa. Nomás Valery parixeba poder creyar periglo, en o primer partiu que se le veye sobreixer.

A la fin una amilloranza insuficient, pero que creba a dinamica de no competir. Ye un primer paso.

Adrián Rodríguez: Aprebau. Evitó o segundo gol.

Aguirregabiria: Aprebau. Se le veyió cumplidor y prebó de plegar en ataque.

Insua: Aprebau. Cumplidor.

Radovanovic: Aprebau. Se retiró tocau.

Pomares: Aprebau. Le faltó una mica en ataque.

Tachi: Aprebau. Tamién se retiró tocau.

Francho: Bien. Prou activo y aparixendo en ataque.

Cuenca: Bien. Vertical y amán d’o gol.

Raúl Guti: Aprebau. Amilloró como meyapunta.

Valery: Bien. Con desborde, ye menester.

Soberón: Aprebau. Lo prebó de todas as trazas.

Saidu: Aprebau. Remató partindo dende a cucha con conduccions.

Sebas Moyano: Suspenso. Sin claridat.

Pau Sans: Aprebau. Lo prebó pero se trobó a faltar una mica de calma.

Dani Gómez: Suspenso. Confuso.

Kodro: Aprebau. Salió a rematar pero no le centroron balons.

Rubén Sellés: Aprebau. Os cambios le baixan a nota en un buen planteyamiento y disposición.

Alejandro García