O Reyal Zaragoza prencipió o partiu presionando entalto, pero nomás duró cinco minutos. Se trobó a faltar a Saidu y Akoukou. L’ Almería estió inocent cara a portería en a primera parti y no resolvió bien no menos de cuatro ocasions de gol. Por parti zaragocista, nomás un disparo de Moyano.

Tot cambió de raso en a segunda parti. L’Almería ponió dos gols. Chirino abanzaba en a suya banda pa poner un gol y Embarba aproveitaba un present de Keidi Bare. Allora se veyió un Reyal Zaragoza más valient, sin cosa que perder, cal preguntar-se por qué no s’ha visto mas a l’equip asinas, a lo menos contrimostró bella capacidat de reacción. Porque l’Almería continó estando un equip feble en esfensa con tot y con ixo de tener dos gols d’avantalla.

Pinilla demandó más minutos de chuego nomás salir, un disparo suyo aproveitó Kodro o refús pa poner asperanza. Y a verdat estió que podió fer l’empace, más que más en un remate de Pau Sans. Pero Puigmal remataba una buena acción y poneba o tercer gol local. Soberón tamién contrimostró an ha de chugar, en l’aria, y poneba o 3-2 dimpués d’un buen centro de Francho. O partiu continó varrenau y Lopy poneba o cuarteno gol.

A sensación final ye que iste equip puede chugar d’atra traza, sin cerina. A lo menos veyer bel chuego en ataque. A la fin remata a chornada como o zaguer clasificau en una baruca que pareix no tener fin. ¿Estará en a cadiera a solución? ¿Un entrenador con más pedigrí en a categoría?

Andrada: Suspenso. No ha amillorau a Adrián.

Francho: Aprebau. Siempre se deixa tot.

Insua: Suspenso. Superau.

Tachi: Aprebau. Le ponió punt d’honor.

Tasende: Suspenso. Ni en esfensa ni ataque.

Keidi Bare: Suspenso. Un present carero.

Toni Moya: Aprebau. Lo prebó en un meyocampo que naufragó.

Raúl Guti: Suspenso. Trobó a a faltar a Akoukou.

Cuenca: Aprebau. Prebó bella cosa en ataque.

Sebas Moyano: Aprebau. Estió más entonau.

Dani Gómez: Suspenso. No podió fer cosa.

Kenan Kodro: Bien. Gol y se notó a suya presencia.

Pau Sans: Aprebau. Podió empazar.

Soberón: Bien. Activo y ponió un gol.

Valery: Aprebau. Entró bien en chuego.

Hugo Pinilla: Bien. Ha d’estar titular.

Gabi; Suspenso. Planteyamiento timorato. Tien equip como pa chugar a ganar. Ha apiorau a bel chugador.

Alejandro García