O Reyal Zaragoza contina sin ganar, bien lo podió fer sin chugar un partiu rutilant. Tenió prous ocasions, que falló, y una decisiva actuación dende o VAR. Os dos equips mantenioron a suya portería a cero por primera vez ista temporada, l’Albacete veniba con tretse gols. Tanimientres Andrés apenas habió d’intervenir.

Akoukou manullaba o partiu dende o meyocampo, encara que remató o partiu con problemas fisicos. Guti yera comodo en un rol más creyativo. Por precaución, dentró Keidi Bare en o descanso, que ye una buena noticia que pueda aportar. Pero a o Reyal Zaragoza se le troba a faltar mas chuego colectivo, automatismos y continuidat en o chuego. As ocasions plegoron mas perque se i feban a fumadas que por chuego. A lo que cal adhibir que varios chugadors importants encara no son en a millor forma fisica. Caldrá continar tenendo paciencia pero a l’equip cal prencipiar a exichir-le una mica más.

Allora prencipió l’actuación de Avalos Barrera dende o VAR. Un arbitro de mal ricuerdo antis de ser descendiu. Gritó a Daniel Palencia dimpués de sinyalar penalti por man. A norma y a interpretación ye prou barafundiosa. Bi ha man pero se interpretó en posición natural, tot y que talla un man a man con o portero.

En a segunda parti, os cambios no facioron honra a l’equip. Se trobó a faltar a calidat de Bazdar y encara Pinilla, en un partiu an no bi habió claridat pa poner un gol. Francho estió desencertau en as dos millors ocasions, fallando en o tiro y pase. Ni Valery ni Soberón son en buena forma. Han de chugar pa prener-la pero l’equip lo nota.Y Kodro estió dica que o fisico le permitió. Dani Gómez un día más, se movió por tot lo frent d’ataque.

En atra chugada barafundiosa, un corner en curto, Saidu poneba un gol. Pero no se entiende que se tarde cinco minutos en determinar un fuera de chuego con a tecnolochía d’o fuera de chuego semiautomatico. Más que más cuan se veye que a pilota toca en un chugador forano y que Insua no la toca. Tamién talló un buen inte local en o partiu, que fació a l’equip quedar-se fredo. Gabi, sin citar-le, creticó arrienda a Avalos Barrera. Fizo un analisi una mica masiau bogal d’o partiu.

A la fin, l’equip contina sin ganar, le cuesta creyar y tener continuidat en o chuego y bi ha masiaus chugadors difuera de forma. Pero no se veyería tan fosco sin o VAR.

Andrés Rodríguez: Aprebau. Poco treballo, más sensación de seguridat.

Francho: Aprebau. Fació un poder de lateral pero estió desencertau en ataque.

Insua: Aprebau. Dio seguridat.

Saidu: Aprebau. Más discreto y una mica mal en o pase.

Pomares: Bien. Seguro en esfensa y puyó más a banda que atros días.

Akoukou: Notable. Duenyo d’o meyocampo y sin estar en forma fisica.

Raúl Guti: Bien. Comodo en un rol creyativo con Paul a o suyo canto.

Sebas Moyano: Suspenso. Masiaus partius sin incidencia.

Paulino: Aprebau. Siempre lo preba.

Kenan Kodro: Bien. Buen treballo pa l’equip.

Dani Gómez: Bien. Lo prebó tot en o partiu.

Keidi Bare: Bien. Se le veyió bien dimpués de prou tiempo.

Valery: Suspenso. Masiada conducción sin periglo.

Soberón: Suspenso. Sin incidencia.

Pau Sans: Aprebau. Prebó de ser vertical.

Juan Sebastián: Suspenso. Difuera de sitio en o lateral cucho.

Gabi: Aprebau. Aprebau raso, no tenió culpa d’as ocasions falladas ni de o VAR, pero cal prencipiar a veyer más cosas.