A divulgadera Silvia Cebolla presentará este chueves 11 de setiembre en a ciudat de Zaragoza a suya nueva achenda de ro curso 2025-2026, un procheuto que naxió con l’obchectivo de fer vivir l’aragonés día con atro.

A presentación ye en a tabierna “Ordio”, situata en a carrera Espoz y Mina, 7, en un acto do se charrará de ras caracteristicas de l’achenda y de ro treballo feto pa ra suya elaboración.

Esta achenda, que va dende setiembre de 2025 dica setiembre de 2026, ye muito mas que un simple calandario. Ye una repleca completa de ra identidat aragonesa. En as suyas pachinas se pueden trobar marcatas totas as festividaz d’Aragón, asinas como as tradicions mas emblematicas, tot explicato en aragonés.

Cada semana, se puet trobar una nueva “frase feta” en aragonés, fomentando asinas l’aprendizache y l’uso diario. A semana ye estructurata de forma practica, amostrando es días, meses y festivos en aragonés, con un espacio dedicato a ra “frase feta” semanal. Pa rematar, l’achenda incluye a ra fin un practico glosario a do se replecan totas estas frases con o suyo significato, convertindo-se en una ferramienta didactica muito valuosa.

Pero ro idioma no ye l’unico atractivo. A part visual ye responsabilidat de l’ilustrador Chema Cebolla, que ha dotato a l’achenda d’un estilo grafico personal y acullidor. A maquetación ye fruito de ro treballo de David Gaya, mientres que ro disenyo cheneral y ra estructura de contenitos (incluyindo cómo se meten as frases y ras calendatas) ye labor de Silvia Cebolla.

L’autora se declara “muit contenta” con o resultato final d’este prochecto, que no pretende estar un feto aislato. Cebolla ya s’ha planteyato de continar en estas linias, con a idea de sacar en un futuro belaltra cosa relacionata con articlos de papelería y regalos, siempre con l’aragonés como protagonista.

En resumen:

• Qué ye: Una achenda en aragonés (2025-2026).
• Autora y disenyadora: Silvia Cebolla.
• Ilustrador: Chema Cebolla.
• Maquetador: David Gaya.
• Qué incluye: Festividaz y tradicions d’Aragón, calandario en aragonés (días, meses), una “frase feta” semanal y un glosario final.
• Presentación: Chueves 11 de setiembre en “Ordio” (Carrera Espoz y Mina, 7 Zaragoza).
• Futuro: Mas productos de papelería y regalos en aragonés.