Talment fa uns anyos vusté yera de ros que se preguntaban cómo heba estato posible que un país como Alemanya estase ro escenario de ra naximiento y desenrollo d’una de ras mas abominables obras humanas. Talment vusté s’escandalizase en o suyo momento con as explicacions sobre ros cambos de concentración y d’exterminio nazis, y con o proceso que condució a que millons de personas consideratas «sers inferiors» fuesen masacratas sin contemplacions. A ro mesmo tiempo, puet ocurrir que vusté siga hue de ros que chustifica que s’organicen persecucions y linchamientos cuentra ra población extranchera en bela localidat espanyola. No me s’escandalice, pero, si esto ye asinas, vusté ha dato ro primer paso en o proceso mental que, en poco tiempo, puet levar a chustificar crímens como ros cometitos per es nazis.

As linias argumentals que son utilizando ros sectors mas reaccionarios de ro panorama politico espanyol frent a ro fenomeno de ra immigración son evidents y, lamentablement, efectivos. Ixo ye asinas perque ras proclamas racistas no se proclaman en o vuedo, sino en un contexto social y politico en o cualo ya han operato previament unatro tipo de mensaches que afavorexen a penetración de discursos cada vegata mas escalcanyatos.

No ye garra secreto que b’ha sectors que han decidito fer carrera mediatica, politica u empresarial meyant a utilización descarata de ras cerinas de ra población. B’ha publicacions que han feto d’ixo ra suya razón de ser, recorrendo a ro sensacionalismo mas raxoso con l’obchectivo de meter en a diana a sectors concretos de ra sociedat, chenerando con as suyas exacheracions y desinformacions intresatas un clima de preocupación que cala muito eficazment en determinatos sectors de ra población que, en cheneral, no conoxen a dengún que haiga sufierto ros problemas que les preocupan, pero sí, invariablement, a «belún que conoxe a belún».

O fenomeno de ra «okupación» ye un caso claro de cómo opera este tipo de discursos, dica ro punto que se ye naturalizando ro fenomeno que existan interpresas dedicatas no ya a emplenar as casas de cameras y sistemas d’alarma, sino a desaloxar per a fuerza a cualsequiera que haiga estato acusato de residir ilegalment en una vivienda. A cerina a que a un le ocupen a vivienda mientres sale a per o pan opera, y muito, en amplios sectors de ra población. Y ixa cerina ha estato fomentato y alimentato ampliament.

O mesmo ocurre con a población extranchera, enta qui se dirichen agora ros canyons de ra propaganda reaccionaria. O que hemos visto recientment en Torre-Pacheco nos amuestra con muita claridat per do van a escurrir as consignas de l’enemigo en o futuro proximo. Una de ras mas chocants ye ra que s’esforza per caracterizar como lumpen a ra población immigrant. Sin meyas tintas. Realment cuesta saper qué ye mas preocupant, si l’uso alegre de ro termen lumpen u ro desconoximiento de ra realidat en que vivimos, pero esto ye operando eficazment y ye plegando a sectors que dicen estar politizatos en o marxismo.

Pa ixos que dicen ser comunistas y mercan es argumentos allenos, culle un amigable recordatorio que ro primero que un comunista ha de preguntar-se cuan quieren convertir a belún en o suyo enemigo ye si explota u ye explotato. Y dimpués ya tot o de demás, pero dinantes ye necesario conoxer si ixa persona a ra cuala quieren que t’enfrontines ye de ros tuyos u no. Perque si ye de ros tuyos, si ye de ros explotatos, cal fer tot o posible pa unir-lo a nuestra luita común cuentra ros que nos explotan a toz dos, que son, casualment, es que mas se benefician de ro nuestro enfrentamiento, d’explotar as nuestras cerinas y de fer-nos creyer que vivimos en una realidat en a cuala ells son es «buenos» y toz es de demás somos poco menos que sers inferiors.

Ástor García