COVISIAN sosprende a ra plantilla de Calatayú con un ERE, en plenas vacancias estivals, que afecta mas de 85 treballadors y treballaderas de ra Plataforma que ro Grupo italiano tien en a capital bilbilitana.

A interpresa COVISIAN, con mas de 10 anyos de presencialidat en a comarca, y que presta servicios de Contact Center pa numerosas interpresas a livel estatal, ha comunicato a ra RLT (Representación Legal de ros Treballadors) ra interposición d’un ERE (Expediente de Regulación d’Emplego, despido colectivo) que afecta a toz es treballadors y treballaderas de ra campanya d’Atención a ro Client de Xfera Moviles (MasMovil).

O motivo esgrimito per a dirección, pa interposar este ERE, ye ro zarre de ro servicio MasMovil que prestan en l’actualidat mas de 85 treballadors y treballaderas de ra plataforma situata en o Poligono Industrial de ra Charluca. COVISIAN (antiga GSS) disposa d’atros centros a livel estatal y, actualment a plataforma aragonesa conta con atras dos campanyas que dan emplego a mas de 55 treballadors y treballaderas.

Dende ro sindicato SOA entienden que este ERE suposa un duro truco y una malisma noticia, pa Calatayú y ra suya comarca, ya que COVISIAN (anteriorment GSS) ha estato un motor de contratación a livel comarcal plegando a contar, no fa muitos anyos, con una plantilla de 500 treballadors y treballaderas (incluyitos es emplegatos meyant cuantas ETTs) en a suya mayor part prestato per mullers.

Dende ro sindicato SOA afirman meter tot o suyo esfuerzo negociador en luitar per o mantenimiento de l’emplego en una comarca acostumbrata a vier desaparexer o suyo texito productivo sin ofrir alternativas reals de recolocación. Confirman ser conscients que, ro proximo martes 2 de setiembre, escomencipia una larga, dura y tensa negociación do se chugan a supervivencia d’un de ros pocos motors economicos de ra zona y, do asperan, a colaboración, aduya y presencia activa de ras institucions de Calatayú.