O diputau de CHA responde a O Dichital dimpués de que se conoixese a financiación de 100.000€ dende lo gubierno central pa protecher as luengas d’Aragón que se repartirá entre l’Academia Aragonesa de la Lengua y a Diputación Provincial de Zaragoza.

Mesmo lo director de l’Instituto de l’aragonés de l’AAL, Juan Pablo Martínez, creyeba que ixos diners yeran insuficients pa lo treballo que habría de fer l’Academia, pero se podrán fer cosas.

D’atra man, Jorge Pueyo valuraba asinas la noticia en una entrevista pa O Dichital.

– ¿Cómo ha estau o proceso de negociación con o gubierno central pa financiar as luengas propias d’Aragón?

Ha siu un proceso muit duro. Han siu cuasi dos anyos de negociaicions perque, el que nusatros hesem quiesto de primeras, eva fer esta aduya via Presupuestos Chenerals de l’Estau.

Manimenos, hem trobau muit buena disposición per part d’el Ministerio de Cultura que, igual que va fer con el Periferias, ha entendiu con l’aragonés y el català d’Aragón, que estam sufrind un proceso de censura y asimilacionismo cultural per part de Vox, pero tamé del PP que han dixau a 0 las aduyas a las llenguas, han eliminau la programación en l’arradio y televisión publlica aragonesa incumpllind la llei de llenguas d’el mesmo PP de 2013, han estricallau la Dirección Cheneral de Politica Llingüistica, premios u mesmo la Catedra Johan Ferrandez d’Heredia.

Unas politicas que entienden la llengua como arma politica, como vam veyer a la ciudat de Uesca con es cartels a la dentrada u como veyem en la mesma toponimia, eliminand per dir bell eixempllo la historica carrera El Forno de Graus per “Calle El Horno” y mesmo dind que ara no de dice “ibón” y cal “ascenderlo” a “lago”.

Per ixo el que reivindica Chunta Aragonesista é que la llengua no tiene color politico y é de toz y totas es aragoneses y aragonesas, charren u no charren aragonés.

– ¿ Ta do van destinaus ixos diners?

Las aduyas van ta l’Academia Aragonesa de la Lengua, cuya existencia cal reivindicar, pero que cal dotar tamé de fondos, pa fer actividaz de promoción de la cultura e investigación en las llenguas propias de Aragón, per importe de 50.000 euros.

Y pa la Diputación Provincial de Zaragoza, p’actividaz de promoción de la cultura en las llenguas propias de Aragón, per importe de 50.000 euros.

Y pa que ixas dos institucions aduyen a las asociacions, municipios y comarcas a fer actividaz culturals en aragonés y català d’Aragón.

– ¿Creyes que ye prou con ixa financiación pa poder esfender as luengas como cal?

Creigo que son miojas, pero que qui caldría que invertise en el patrimonio inmaterial que son las llenguas d’Aragón igual que invierte en patrimonio material, é el Gubierno d’Aragón y la resta d’institucions aragonesas.

– ¿Cual estaría o paso siguient pa dignificar l’Aragones y o catalán en Aragón?

Creigo que un paso chicot que se podría fer y pa’l que tamé estam pretand é pa que L’Academia Aragonesa de la Lengua tienga fondos propios pa’l propio funcionamiento corriente como tienen la resta d’Academias (tamé las no oficials como la de l’asturianu).

Cal que el Gubierno d’Aragón cumpla con la llei de llenguas tamé y que no tienga ixa tentación de Vox que eliminar el nome de las nuestras llenguas.

Y cal que como sociedat civil aragonesa dixem de banda las luitas internas y treballem en una mesma llinia de treballo enta la oficialidat de la nuestra llengua perque sin oficialidat la chent que charram aragonés y català d’Aragón no tendrem dreitos llingüisticos pllenos y seguirem veyend como la nuestra llengua se pierde.

El futuro de la nuestra nación está en chuego. Y, como dice Au d’Astí: “Cal defender la identidat”