Fa pocas semanas, a criptomoneda Bitcoin aconsiguió un nuevo maximo historico (ATH, en anglés All Time High), superando ros 110.000 $. Pero poco antes, en metat de ra escalada d’arancels entre Estatos Unitos, a China y ra Unión Europea, Bitcoin se trobaba en un periodo baxista de cuantos meses, plegando a trencar a ra baxa ro suelo de ros 80.000$. Cualques meses antes, en noviembre y aviento, heba aconseguito ros 106.000 $, dimpués de ro cualo dentró en recesión. Cuantos factors, como ro rapido incremento de ra suya capitalización en o mes de noviembre, ra posterior disipación de ra euforia financiera desligata dimpués de ra victoria electoral de Trump, as millonarias estafas de tipo «pump and dump» de Trump y Milei en febrero y, finalment, a luita arancelaria, facioron que Bitcoin sufrise ra suya caita mas gran de ros zaguers cuatro anyos.

En aquel contexto, no podioron faltar as noticias sensacionalistas y ras proclamas catastrofistas. Pero pocos días dimpués de ra caita, Bitcoin recuperaba ro suelo de 80.000 $ y, dimpués de l’anuncio de Trump de ra paralización temporal de ros arancels, Bitcoin recuperó con fuerza ra suya tendencia alcista y superó de nuevo ra capitalización de 100.000$. Esta volatilidat y fuerza alcista de Bitcoin, que se da en bela traza de forma autonoma respective a ra resta de mercatos financiers, responde a ros clamatos «ciclos» que, dica agora, vienen ocurrindo cada cuatro anyos aproximadament y que s’explican por diversos motivos vinculatos a ra suya propia tecnolochía y a ras singularidaz d’un mercato composato en a suya totalidat por capital ficticio. En l’anterior ciclo, zarrato a zaguers de 2021, Bitcoin aconsiguió una capitalización de 65.000$ en o suyo momento alchido, y se desplomó por debaxo de 20.000$ un anyo dimpués. Nos trobamos agora en o zaguer anyo de ro nuevo ciclo y, por tanto, ye posible que Bitcoin aconsiga ro suyo nuevo ATH en es proximos meses antes de desplomar-se por cuantos anyos.

Estas dinamicas propias de Bitcoin s’explican por una serie de singularidaz que, dica ra calendata, no han estato fundament analisatas por a economía politica marxista, tot y que ro mercato cripto y ra tecnolochía blockchain se constituyen como elementos importants de ro capitalismo moderno.

Y ro cierto ye que ro motivo orichinario de Bitcoin estió, tot y con o que nos pueda parexer a primera vista, convertir-se en una alternativa a ro mundo financiero «tradicional», tal como se repleca en o suyo manifiesto fundacional. A intención yera chenerar una moneda capable de substituyir a ros diners metalicos y que fluyese por difuera de ras institucions financieras centralizatas (como ros bangos), en un sistema completament transparent do no se puet amagar garra transacción.

Durant o ciclo anterior (2018-2021), muitos intentón dar-le un sentito «útil» a ras criptomonedas, especialment dimpués de ra surchita de ra criptomoneda Ethereum, que s’erichió como ra «alt-coin» (criptomoneda alternativa a Bitcoin) mas relevant, plegando a una capitalización de 4.600 $ en a suya ATH en 2021. Esta utilidat implicarba ra posibilidat d’invertir, meyant estas criptomonedas, en determinatos prochectos tecnolochicos que lanzaban ro suyo propio token pa financiar-se. U siga, que estas inversions no teneban como solo y exclusivo motivo ra pura especulación, sino ro financiamiento de prochectos reals.

Pero ras dinamicas especulativas de ro capital ficticio s’imposan sobre cualsequier idea fantesiosa y, dimpués de l’evident fracaso de ra «utilidat» de ras cripto, Ethereum no aconsiguió, a ro menos dica ro momento, recuperar ro suyo ATH de 2021. Por cuentra, ra surchita de Solana, una criptomoneda que ras suyas transaccions son practicament gratuitas, ye muito mas eficient pa ra pura especulación, o que la ha posicionato rapidament como ra criptomoneda mas adecuata pa ros ludopatas de ras inversions y ra floreximiento de ras memecoins. Es movimientos vertichinosos de ras memecoins, que en ocasions plegan a lanzar 100 %, 1.000 % u 10.000 % en beneficios pa cualques inversors (o que, pa atros, implica perdas proporcionalment inversas), y ra facilidat d’acceso a Solana fan que cada vegata mas chóvens se veigan atraitos por o relato que existe una vía d’escape a ro treballo asalariato meyant a especulación con as criptomonedas.

En cualsequier caso, tanto Solana como Ethereum y ra resta d’«alt-coins» dependen por completo de ro movimiento de Bitcoin, van a ra suya coda. No ye posible, por tanto, analisar de forma independient as distintas «alt-coins»: si no s’analisan baxo ro bateauguas de ros movimientos macroeconomicos de Bitcoin, es suyos movimientos son simplament incomprensibles.

Y ro cierto ye que Bitcoin parexe alcanzar-se cada vegata mas a ro «tradfi» (mercato financiero «tradicional») frent a ro cualo pretendeba posicionar-se como alternativa. A progresiva dentrata d‘inversors cada vegata mayors, entre ros cualos se troban chigants monopolios que desembolsan millons de dólars; a creyación de reservas de Bitcoin por part de cada vegata mas Estatos; y ra dependencia cada vegata mayor de ras politicas economicas globals fan que Bitcoin y, con él, tot o mercato cripto, vaigan adecuando-se poco a poco a ras dinamicas chenerals de ro capital global. A tendencia a ra centralización de capitals se manifiesta con fuerza dentro de ro propio mercato cripto, y ra suya vinculación con es capitals industrials y financiers ye cada vegata mas estreita.

En zagueras, y esto ye especialment interesant, o mercato cripto, tot y con es apolochetas de ro capital, cuentrimuestra una de ras tesis basicas de ra economía politica marxista: l’intercambio no chenera, ni puet chenerar, garra tipo de valor. En un mercato de capital ficticio, basato exclusivament en l’intercambio, ras ganancias d’uns son perdas d’atros. O mercato cripto ye una mareya de constants transaccions que mueven o capital d’un costau a unatro, pero nunca ra capitalización de ro mercato podrá aumentar si no se le inchecta dende l’exterior nuevo capital. Por ixo, como decíbanos, o creximiento de ro mercato cripto va necesariament aparellato a ra suya vinculación cada vegata mas estreita a ras dinamicas de ro capital financiero global, porque ye d’este de ro cualo se nutre. Es inversors privatos, que en ciclos anteriors tenioron un peso considerable y que le daban bela autonomía a ro mercato cripto respective a ras dinamicas de ro gran capital financiero, son cada vegata mas irrelevants debant de ras decenas de millons de dólars que invierten es grans monopolios y ra suya crexent dependencia de ra politica economica global.

A substancia de ra valor, cuentrimuestra teoricament Marx en o Capital, ye ro treballo humano. A substancia de ra valor, cuentrimuestra practicament Bitcoin, ye ro treballo humano.

Tomás Ferreira