As interpresas publicas ferroviarias, Renfe y Adif, ocupan en es zaguers anyos gran part de l’actualidat en o nuestro país. Sin duda, l’activismo en rez socials de ro ministro de Transportes, Óscar Puente, contribuye de traza important a ixo, pero cal reconoxer que ra repentina pasión ferroviaria de ro ministro no explica ra exposición publica que ro sistema ferroviario espanyol ha tenito en es zaguers anyos. As diferents tramas de corrupción que corroden a ro Gubierno socialdemocrata han salpicato de traza directa a totas dos interpresas publicas, pero creyemos que tampoco no se localiza en esta cuestión a explicación y ro motivo por o cualo tanto Renfe como Adif acaparan en gran mida as portadas de ros periodicos informativos. Evidentment, no queremos fer entender que ra corrupción ye una cuestión menor; simplament queremos sinyalar que ros casos de corrupción que afectan a totas dos interpresas y que hue son obchecto de debat en as sesutas tertulias que acaparan es meyos de comunicación no son mas que ra manifestación superficial d’un entramau de relacions economicas en o cuao ros politiqueros de ra burchesía meten a ra disposición de ro capital privato inchents recursos publicos que son producto y resultato de ro treballo social de millons de treballadors y treballaderas de ro nuestro país.

Si femos un somero repaso a ros zaguers incidents que han afectato a ro sistema ferroviario espanyol, nos trobamos con es habituals robos de cobre que de rapiconté se pretenden convertir en sabotaches, con o colapso de ra estación de Chamartín, con es succesivos descarrilamientos y suspensión de circulacions en a redolada de Madrid, con es arretrasos y supresions por falta de personal en Rodalies, con es trens Avril de recient adquisición y que presientan diversos problemas relacionatos con o software, con diferents incidencias por cayitas de tensión en as linias d’alta velocidat, con trens que no dentran por es túnels, con arretrasos en es plazos d’execución de ras obras previstas pa ra millora de ra infrastructura y que fan espacenciar es usuarios, con a fallita alta velocidat a Estremadura… Toz estos casos, que no son mas que una muestra de ros que han tenito resonancia a livel estatal, son de tan diferent naturaleza ros uns y ros atros que serba absurdo achaquiar-los a ixes factors exochenos que son día con atro en ixas televisivas atalayas de ro saper.

Pero tal diversidat de problemas que aquexan a ro sistema ferroviario ha de tener necesariament una causa u causas que ofrexcan una explicación de toz ixos succesos y que siga a plego de l’entendimiento humano. Mas arriba afirmábanos que ros recients casos de corrupción publicatos no explicaban a situación por a cuala cruza o ferrocarril. Manimenos, a corrupción ye ra causa, ro nyudo gordiano que une ros diferents succesos en es cualos s’ha manifestato ro changato estato en o cualo se troba ro sistema ferroviario espanyol. A corrupción a ra cuala nos referimos no son ixos casos esporadicos que salen en es meyos y que acota ro problema a ra falta d’escruplos y etica d’un u cuantos suchetos; nos referimos a ra corrupción que ye intrinseca de ro sistema capitalista y que, por estar part de ra suya propia naturaleza, goya de rango de legalidat.

O sistema ferroviario espanyol cuenta con 17.932 km en o ret convencional, 1.210 km en amplo metrico y 3.973 km en o ret d’alta velocidat. Seguntes es datos ofritos por Renfe, durant o 2024 ra operadera publica ha desplazato a 537 millons de viachers, de ros cualos 501 millons se corresponderban con desplazamientos en o ret de redoladas, y 26 millons en o ret d’alta velocidat. En es zaguers 35 anyos as inversions ferroviarias s’han distribuyito de ra siguient traza: a ro ret d’alta velocidat s’han destinato inversions por una valura de 56.000 millons d’euros, mientres que en o ret de redoladas as inversions tasament han aconseguito ros 3.600 millons d’euros. A ra luz de ros datos exposatos se puet deducir que ye ro ret de redoladas (Convencional y Feve) ra que tien un mayor impacto referent a ras necesidaz de mobilidat de ro pueblo treballador, por o que ra desproporción d’inversions en favor de ro ret d’alta velocidat no se chustificarba con base en l’interés cheneral. No queremos con esto subestimar a importancia de contar con un ret d’alta velocidat que connecte y comunique ro territorio alcorzando ros tiempos de desplazamiento, nomás sinyalamos que ras necesidaz cutianas de ro puebo se troban relacionatas con es desplazamientos realizatos en o ret de redoladas, con o que ra lochica indicarba como prioritario concentrar es esfuerzos economicos en guarenciar a satisfacción de ras necesidaz de ros mas de 500 millons de viachers que se tresladan en o ret de redoladas. Pero no parexe que ros diferents Gubiernos capitalistas s’haigan guiato por a lochica que imposan as necesidaz populars, sino que ro reparto de ras inversions ferroviarias s’ha guiato por unatro tipo de necesidaz y intereses. Son es intereses de ros monopolios que acceden a ra practica totalidat de ras concesions ferroviarias es que guían y deciden as prioridaz en as inversions de ro sistema ferroviario.

Comsa, Ferrovial, ACS, FCC y Acciona son as interpresas que copan as obras de renovación, construcción y innovación de ras infrastructuras ferroviarias en o nuestro país. As ganancias que estos monopolios s’han embolsato durant toz estos anyos, unitas a ra incorporación d’operadors comercials privatos a ra prestación de servicios ferroviarios, son es factors que han determinato ra priorización de ro desenrollo de ro ret d’alta velocidat frent a ra de redoladas. Es beneficios que les reportan a estos monopolios as obras de construcción de ra infrastructura d’alta velocidat frent a ras menors ganancias que se derivan de ro mantenimiento de ret de redoladas ye ro que ha condenato a esta zaguera a l’actual estato d’abandono en o cualo se troba. Ye en este entramau de relacions y intereses economicos do dentran en escena Adif y Renfe, operando como intermeyadors necesarios pa continar con o tresvase masivo de ras rendas de ro treballo a ro capital privato pa guarenciar dende ro propio Estato capitalista as ganancias de ros monopolios, especialment en es periodos d’agudización de ras recurrents crisis de ro capitalismo (2008, 2012, 2019).

O sinyor ministro de Transportes parexe confundir con sabotaches o que no ye que ra forma en que opera ra lochica de ro capital en o sector ferroviario. Una lochica que imposa frent a ras necesidaz populars es intereses de ros monopolios, que son satisfetos con es recursos que cheneramos es treballadors y treballaderas de ro nuestro país. Una lochica que exiche condenar a l’abandono mas absoluto 19.000 km de ro ret ferroviario, precarizar as condicions laborals y salarials de ros treballadors de ro sector y sosmeter a ras interpresas publicas, Adif y Renfe, a un crexent desprestichio debant de ro pueblo treballador como consecuencia de ro papel que se les asigna en este entramau politico y empresarial que determina ra realidat de ro ferrocarril en o nuestro país y que responde, en zaguera instancia, a ro carácter de clase de ro Estato burchés como garant de ras ganancias de ros capitalistas.

O verdadero sabotache lo sufrimos es treballadors y treballaderas que, mientres con es nuestros diners se guarencian as ganancias d’una minoría parasitaria, padexemos diariament as consecuencias de ro espolio a ro que ye sosmetito ro ferrocarril publico.

Tote Fernández