A viella dama se heba engalanau, un pleno a rebutir como en es suyos millors diyas. Os zaguers bufandeos y cantar l’himno a cappella. Pero bi heba muito en chuego, a permanencia y no meter en periglo l’esdevenidero d’o club. Asinas que a tardi prencipió con una recullida plena de zaragocismo a l’autobús de l’equipo. Y dentrar a l’estadio un poco antis pa poder parar bien o tifo que remeraba o zaguer partiu, a casa zaragocista dende 1957. O puesto an cheneracions de zaragocistas han sentiu toda mena d’emocions.

A o Reyal Zaragoza se le veyeba una mica agarrotau, fallando controls y pases fácils. Con a premisa de mantener a puerta a cero y asperando a suya ocasión. Chugando con tres meyocampistas puros. O Dépor yera comodo manullando a pilota con criterio pero poco periglo. De feito, as millors ocasions estioron locals en o rafe d’o descanso. Más que más un gran remate de Dani Gómez que repelió lo palo. Un debantero que pareix que fa más honra pa o tipo de chuego que planteya Gabi que no Soberón, qui pareix que le ye menester un companyero que le traballe os espacios.

A tardi se metió nubla y tamién con as noticias que plegaban dende Elda, empazaba o Racing pero tornaba a marcar l’Eldense. Chusto en ixe minuto se ubrió lo ciel y aparexió por un inte o sol. Caleba estar en un corner como marcase o Reyal Zaragoza. Recurso que ha rentau muitismo con Gabi. Queda un autogol de Patiño como o zaguer gol en A Romareda. Dimpués Soberón podió sentenciar, pero Yeremay esclafó a pilota en a cruceta. Y poco más en un partiu an se cumplió con l’obchectivo.

A la fin d’o partiu, l’afición que heba estau alentando como caleba, chifló tanto a chugadors como directiva, dimpués de semanas de patir muitismo, farta ya de cinco anyos con o descenso cada vez más amán. Gabi lo reconoixió en a rueda de prensa, que ye menester cambios de raso. Francho pedió meco a l’afición en o discurso de despedida a l’estadio y tamién anunció a suya renovación. Dimpués invasión de campo pa despedir A Romareda, un poliu ricuerdo poder pisar o bradín.

Agora cal pensar en un Reyal Zaragoza a l’altura d’a suya afición. Que como dició Gabi, o nuevo estadio siga referencia d´os cambios en o club que cal. Prexinar una plantilla más acorde a la suya ideya de chuego. Deixar a dulce malanconía que emana d’os ricuerdos en A Romareda y construyir una polida historia en o nuevo estadio.

Gabi: Sobresalient. I venió cuan garra quereba y le ha sobrau una chornada. Pragmatismo.

Poussin: Aprebau. Poco exichiu.

Marcos Luna: Aprebau. Se le notó los partius sin chugar de titular.

Jair: Bien. Solventó o suyo treballo.

Vital: Bien. Concentrau.

Tasende: Aprebau. Cumplió en esfensa.

Francho: Bien. Tornó a o meyocampo con buena nota.

Kervin Arriaga: Notable. Alacetal en a salvación.

Raúl Guti: Bien. Treballador y blincando a la primera presión.

Pau Sans: Bien. Incisivo por a banda.

Adu Ares: Bien. Demandando a pilota, lo prebó siempre.

Dani Gómez: Bien. Casi marca un gran gol. Treballador.

Clemente: Bien. Con rasmia, denguno pasó por a suya banda.

Adrián Liso: Aprebau. No podió aproveitar bel contraataque.

Soberón: Aprebau. Amoldando-se a ista mena de chugar.

Calero: Bien. Ricordó a o lateral solvent d´o comencipio de temporada.

Toni Moya: Sin tiempo.

Bazdar: Sin tiempo. Cal recuperar-lo pa la temporada venient.

Se podioron fer seis cambios por equipo por fer uno por a conmoción d’un chugador.

Alejandro García