Si me preguntasen, yo diría que quiero fuyir de cualsiquier discurso catastrofista u angunias sobre la nuestra luenga. Pero pasando as fuellas d’os libros de Pedro Lafuente, Rafael Andolz, u d’antismás fendo una uellada a las vinyetas de Ramón Acín veigo que la luenga yera bien viva d’entre la chent.

Agora, puestar que tengamos más concencia de que ixas expresions son d’una luenga propia, que no son a traza de charrar de yaya, o como se charra en o lugar. Pero ye bien platero que cal rechirar muito más en a sociedat pa veyer ixe calivo de lo que estió una luenga viva de punta ta coda d’o nuestro territorio.

Empecipio a barruntar como caldría dicir-le-ne a una persona allena a tot isto, d’astí u de fuera, porqué cal cudiar l’aragonés. Y sin eixemplos claros más amás de “ir de propio” u de “charrar” u demás topicos esgastaus, ye difícil amostrar que ye más viva de lo que creyemos.

Yo m’enamoré de l’aragonés porque en a mia familia se charra a-saber-lo. Pero entiendo que p’atra chent tot isto seiga una cosa de romanticos, de frikis u directament de barrenaus.

Por tot ixo, soi angunias. Porque pienso que yera más fácil esgallinar (que deciba yaya) a luenga, si se sintiese más a sobén en a carrera, y no nomás  expresions solencas que si no paras cuenta, no metes o foco en gastar enerchías en una causa casi amortada.

Con tot y con ixo, me fa fastio pensar que plegamos tardi, sí. Pero tamién pienso que no nomás por ixo, voi a reblar con a causa. Dica que en quede una persona más con qui charrar l’aragonés, u un atra que no lo charre pero que l’intrese que le den a chapa, voi a continar dando ferrete porque ye lo que l’esmo me dice que cal fer.

Por chusticia, por memoria, y por tota la chent que ha feneixiu pensando que no sabeba charrar. Y fote si en sabeban…