O programa de Radio Topo anuncia ra suya pausa indefinita dimpués d’once temporatas radiando en aragonés con cerqueza y compromiso.

“Tierra de Barrenaus” ha anunciato ro final de ra suya andadura en Radio Topo. O espacio, un referent de ra comunicación en aragonés, se prendrá una pausa indefinita dimpués de ra oncena temporata, que concluyirá en chunio con un episodio de despedita.

O presentador y creyador de ro programa, Carlos G. Esteban explicó que ra decisión responde a ra necesidat de “repensar estratechias” y dedicar tiempo a atros prochectos, como un libro que aspera publicar en 2026 u 2027. “Lo pior aragonés ye lo que no se charra”, recordaba, reivindicando ra importancia de crear espacios pa “la nuestra luenga, tan ferida y maltratada, tan minorizada y abandonada”.

Una decada de voces y complicidaz

Dende ro suyo estreno en 2015 —dimpués de colaborar previament en “La Enredadera” con a sección “L’aragonés ye bien vivo”—, “Tierra de Barrenaus” ha combinato entrevistas, mosica, cronicas socials y humor con un enfoque alexau de “dogmatismos u purismos”. Entre ros suyos oyents destacan as connexions emocionals: es mensaches en rez, es comentarios en centros de socialización en aragonés, y ro carinyo de qui “yeran a l’atro costau d’a emisión”.

O programa no ha evitato mencionar as suyas dificultaz, pero ro suyo balanz ye positivo. Encara quedan programas pa compartir noticias, risas “y muito amor per l’aragonés”, ha subrayato ro suyo conductor.

Un adiós definitivo?

A pausa durará “minimo un anyo, maximo la eternidat”. Asperando que belún dé ro paso que “yo habe diez anyos, que tos animez a fer lo vuestro programa en aragonés, con los vuestros codigos, las vuestras ideyas frescas y nuevos contenius”, ha animato, citando como referent a “O zaguer hibierno de l’alma”, l’atro espacio en aragonés en a radio.

O zaguer episodio s’emitirá en chunio, zarrando una etapa que, seguntes o suyo creyador, ha estato un acto de resistencia: “Emitir nos fará vencer”. Mientres, l’aragonés sigue ra suya batalla por sobrevivir, agora con un espacio menos en as ondas.