Galicia ye tierra an pleve a sobén, pero brilló a escape o sol pa o Reyal Zaragoza. Dani Gomez falló un man a man, pero en l’atra chugada Soberón asistió a Guti que embocó lo 0-1 sin haber pasau un minuto. Se podeba pensar que os niervos serían mas quedos, pero china chana o Racing de Ferrol, ya descendiu, fue ganando terreno. Pero sin creyar periglo claro a un Poussin cuasi inedito en o primer tiempo. Con tot y con ixo, cuan o Reyal Zaragoza presionaba alto, recuperaba con facilidat a pilota y parixeba cerca o segundo gol. Con un equipe local sulsiu en esfensa.

O segundo tiempo prencipio con una estreta, con un gol anulau a o ex zaragocista Álvaro Gimenez, qui ya mos heba feito dos favors, fallando un penalti en a ida y marcando fa poco a ĺ Eldense. Por una dubdosa falta sobre Jair. Un entonau e inspirau Adu Ares, que heba saliu dende a cadiera, fació una buena chugada pa levar o 0-2 y lo que parixeba a tranquilidat, pero ista pareix incompatible con o Reyal Zaragoza. Dende o VAR se gritaba a Moreno Aragón pa sinyalar un penalti por man de Luna, que yera d ́espaldas. Poussin tornaba a aturar o tiro, pero o refuse lo remataba o mesmo Señé pa fer o 1-2.

Dende ixe inte o Reyal Zaragoza se metió cada vez mas en a suya aria a esfender tres puntos de oro, masiau de zaga y patindo prou debant d’un rival con escasa punteria. Pero a la fin aconsiguió lo mas important, ganar tres puntos completaus con a redota de l ́Eldense en Almeria. Un paso enta la salvacion en una temporada pa xublidar.

Poussin: Bien. Aturó o penalti y os centros laterals. Sin errors.
Francho: Aprobau. Con a voluntat y fendo un poder como a ormino.
Lluis Lopez: Aprobau. Endrezó a esfensa.
Jair: Bien. Con decisión en as pilotas divididas.
Tasende: Aprobau. Se prochecto menos en ataque mas centrau en esfender.
Arriaga: Suspenso. Inusualment impreciso.
Raul Guti: Bien. Emparó lo meyocampo y fació un gol.
Toni Moya: Suspenso. Poco preciso.
Pau Sans: Bien. O periglo en o primer tiempo.
Soberon: Aprobau. Poco asistiu, fació una asistencia de gol.
Dani Gomez: Aprobau. Barallero, buen treballo de equipe.
Luna: Aprobau. Se centro en esfender a suya banda.
Vital: Aprobau. Salió a esfender o 1-2.
Bazdar: Suspenso. No aportó guaire y fallo o 1-3.
Adu Ares: Notable. Un gol y personalidat pa demandar a pilota.
Aketxe: Suspenso. Intrascendent.

Gabi: Aprobau. O resultau le salva d ́a racanyeria y que estamos an estamos.

Alejandro García