Queda ya luen aquel viernes 22 de noviembre, cuan s’utilizó a ra prensa pa anunciar un nuevo Ciclo Formativo de Grau Meyo de Formación Profesional en Cocina y Gastronomía que recayerba en Escolapios de Chaca.

Pasato este tiempo y a día de hue, se consuma ro prochecto que se levaba treballando durant dos anyos a espaldas de ros centros publicos y atras administracions.

Este plan se puede definir como ro de ro amiguismo caciquil, o de ro reparto de recursos pa faoriar a empresari@s y ro de ra utilización de ro alumnato sin importar a suya formación integral.

ACOMSEJA, Asociación d’Interpresas de ra Chacetania, celebra ra oportunidat de «desenrollo economico». Escolapios atraye mas fondos publicos pa repartir entre ros docents que éls tríen a ro suyo criterio y ro Concello de Chaca y ro Gubierno d’Aragón marcan a suya estratechia regalando espacios publicos a iniciativas privatas. Fetos comparables a ra concesión d’aulas de 1º y 2º de ra ESO a Santa Ana de Samianigo, estando que b’ha plazas sin cubrir en a publica, u en a ubertura d’una vía mas en 1º d’ESO en es Salesians de Monzón.

Dende CGT Ensenyanza Aragón, ya ro 10 d’aviento s’atrivioron a denunciar publicament una deriva privatizadera, ra que por desgracia ha resultato ro modelo triato. Pa prener estas decisions no s’ha feto cuenta de garra criterio tecnico ni muito menos pedagochico, asinas lo contrimuestra ra nula respuesta de l’administración a ras suyas peticions d’esclarexer ros porqués y ra omisión d’informes chustificativos a ro respective. Tampoco no han contestato a ro centro publico, IES Biello Aragón, que tamién demandó estas ensenyanzas en tiempo y forma. Pa qué “perder ro tiempo” si ye una decisión manifestament politica?

​

Dende CGT Ensenyanza Aragón alzan a voz de nuevo pa expresar que este prochecto teneba cullita pa estar chestionato por o IES Biello Aragón de Samianigo, do ya existe un departamento de Cocina contrastato y do s’aseguraba una ensenyanza gratuita y de calidat. Amás, esta decisión dexa a ro IES Domingo Miral sin espacios y con a dubda de si tot o suyo alumnato podrá cursar as ensenyanzas ofritas pa l’anyo que viene. Por si estase poco, en Samianigo ras institucions locals ofrioron un espacio que conta ya con cocinas industrials y en Chaca s’habrán de construyir dende zero en o espacio de ro IPE, contiguo a ro IES Domingo Miral, u sinyar acuerdos con establimientos privatos. Tot un malfurrie!

A educación no ye un negocio! Menos sinyas de convenios pa utilizar diners publicos en iniciativas privatas y mas responsabilidat en a chestión de recursos pa ra publica, ra de totas!