A luita de Mularroya ye muito luenga, meya vida en varias personas, que s’han deixau tiempo y atras cosas en esfender o riu Xalón. Asinas, encara antis de prencipiar as obras en 2008, o president d´a redolada de ra Val de Xalón, dició unas palabras que hue sonan cuasi profeticas. Con Mularroya podran venir-ie interpresas que consuman muita agua. Cuasi vente anyos dimpués, no creigo que se podese prexinar que mena de interpresas han veniu.

Si esfender a os agricultors, fueras d’os lugars aguas entalto d’a presa, ha estau un alacet d’os suyos argumentos, hue veyemos como muitas fincas grans son propiedat de fondos d’inversión. ¿An queda o agricultor chicot? Cuan se sepa o pre de l’agua, será en ventalla pa poder bosar-la.

Por no charrar d’a dramatica despoblacion dende Embit d’a Ribera dica Morata de Xalon y que podran fer con un riu ixuto. Con una perdida de poblacion d’o 71% en uitanta anyos. Ricordemos que a canal de trescole puede levar 8 m³/s,  tanimientres o caudal meyo en Calatayub ye de 6,445 m³/s seguntes datos d’o ministerio. En uno d’os paisaches mas polius y fascinants d’Aragón, as Torcas d’o Xalón. An encara sobrevuela la menazada alica perdiguera.

Tamién aquí ha plegau a plaga d’as enerchías renovables descontroladas. Un paisache con molins y placas solars, y en son mas cada diya. Sobre lo que antis yeran campos de cautivo u estepas an s’han visto rocins, en periglo d’extinción.

Pero lo que talment no asperaban de raso, ye os prochectos de centros de datos aprofeitando l’exe d’a autovia A-2. Con inversions de milenta de millons. Que marian. Puestos que sí consumen nomás muitisma enerchía, sino antimás muitisma agua en refricheracion. ¿Pa isto caleba construyir Mularroya?

Una vez mas s’ha feito servir a os agricultors chicoz pa fer un prochecto a mida d’as grandes interpresas que son las que se van a beneficiar d’iste recurso. L’entibo y o trescole d’o Xalón ya son feitos, agora veyeremos qui se aprofeita de l’agua. A la fin, Mularroya, os fondos d’inversión, as enerchías renovables descontroladas y os centros de datos forman parti d’un mismo sistema capitalista.

Alejandro García