Encara que afecta a un influyent país africano d’arredol de 130 millons d’habitants e tien implicacions cheopoliticas considerables, la guerra que pateix Etiopia dende 2018 mereix pocos titulars en es medios (el país tampoco en mereixió guaires, pro que no, cuan yera estable e creixeba). Ye cierto que, en materia de conflictos belicos, Etiopia tien una dura competencia mediatica en Ucrania e l’Orient Proximo; manimenos, l’horrible impacto humanitario de la guerra etiope e es suyos efectos pa la estabilidat rechional, chunto al carácter en mutos aspectos excepcional d’aquer país, son pro motivos pa adentrar-se-ie. Tos proponemos seis libros, la mayoría publicatos es zaguers anyos, pa saber-ne una mica mes d’Etiopia e d’el que i pasa.

Antes de mirar-nos mes en detalle altros aspectos, un buen inicio pa situar-nos en o pasato antigo e recient d’el país africano ye Historia de Etiopía, de Mario Lozano Alonso (Catarata, 2022). El libro repasa es esdevenimientos mes importants de la historia etiope en menos de doscientas pachinas, motivo per lo cual no entra en profundidat en garra capítol, pero precisament per ixo nos ofreix una anvista cheneral que nos fa honra pa fer-nos una idea de cómo se son conformatas la cultura e la politica etiopes.

El libro de Lozano Alonso nos conduce dende la gloria del periodo d’Aksum —cuan el primer imperio conoixito en as actuals tierras etiopes e eritreas adopta el cristianismo, relichión que se convertirá en un d’es pilars de la identidat nacional etiope— dica el conflicto que se i desenrolla hue baixo el gubierno d’el controvertito primer ministro e Premio Nobel de la Paz Abiy Ahmed. E ya que hemos escomencipiato este articlo, precisament, referindo-nos a la guerra d’es zaguers siete anyos, una manera interesant de continar leyendo sobre Etiopia ye con una de las obras mes recients que se n’han escrito: Etiopía. Una civilización en la encrucijada (El Viejo Topo, 2024), d’el periodista aragonés Mark Aguirre. Ye, basicament, un libro de viaches, e mes que mes tien l’interés d’aturar-se e indagar en cuantos aspectos especificos de la vida de hue en Etiopia que no son guaire conoixitos dellá de las suyas fronteras. La guerra en ye un, pero tamién aborda aspectos como la expansión d’el pentecostalismo, l’impacto d’el cambio climatico en o día a día de cuantos lugars, es cambios socials provocatos per lo creiximiento demografico e lo desenrollo economico, u las delicatas situacions que se crean en as fronteras que tien Etiopia con vecins tan inestables como lo Sudan d’el Sud, Eritrea u Somalia.

Aguirre i dedica bel·la pachina: ye a la frontera entre Etiopia e Eritrea an que se i ha desenrollato una de las expresions mes cruentas de la guerra actual: el conflicto en la rechión de Tigrai (noviembre de 2020-noviembre de 2022), que ha feto cientos de milars de victimas mortals e ha meso en greu cuestión la unidat de la federación etiope e el suyo prochecto nacional. El nuclio historico d’Etiopia se troba en l’altiplano que, mayorment, ye poblato per comunidaz cristianas ortodoxas etiopes de luenga amharica u tigrinya. E son estes grupos es que se son enfrentatos en a guerra de 2020-2022, con la complexidat anyadita de la implicación de la vecina Eritrea, de mayoría lingüistica tigrinya pero liderata per un president, Isaias Afewerki, hostil de tot con es dirichents tigrinyofonos d’el Tigrai etiope. Se tos querez capuzar en as complexas relacions historicas entre parlants d’amharico e parlants de tigrinya, e entre etiopes e eritreus, no tos podez deixar perder Greater Tigray and the Mysterious Magnetism of Ethiopia, de Haggai Erlich (Hurst & Company, 2023). Ixo sí, tenez en cuenta que, de las seis, ye la obra mes academica e especifica.

Se, per contra, no tos interesan guaire estes aspectos e querez mes periodismo de viache, disposaz de dos libros en es que dos reporters recorren Etiopia e altros países de la cuenca d’el Nilo. ¿El sabébez, que la mayor parte d’el cabal d’este río baixa dende l’altiplano etiope, e que ixo mantién a Etiopia e Echipto en una crisi diplomatica permanent con motivo de la construcción d’una gran presa per parte de la primera? Xavier Aldekoa trata este tema e mes, con protagonismo pa las historias personals e es contextos culturals, en Hijos del Nilo (Península, 2017), una obra en a que el periodista catalán recorre es países de la ribera d’el río mes largo d’el planeta, dende Uganda dica Echipto. Bel·laún d’estes escenarios el trobarez tamién en Los caminos perdidos de África (Random House Mondadori, 2002), de Javier Reverte. A’l periodista madrilenyo le gustaba de dar muto contexto historico en es suyos libros de viaches, e el sabeba meter en o relato con mayestría. Per ixo, encara que ye l’unico libro de la triga que tien mes de diez anyos, el rescato perque pienso que tampoco ye mala idea escomencipiar con Los caminos perdidos de África antes que con tota la resta de libros sucheritos aquí se querez una aproximación amena a’l país. Reverte ye garantía.

Tanco la lista con una de las novelas que mes m’han impresionato. Ye The Shadow King, de Maaza Mengiste, publicata en castellano con el títol El rey en la sombra (Galaxia Gutenberg, 2021). Ye ambientata en a ocupación italiana d’Etiopia entre 1935 e 1941 e relata la resistencia etiope a traviés de la historia d’Aster, Hirut e Kidane e el tribulato chudeu italiano Ettore, personaches que sirven a Mengiste pa retratar una violencia estructural no només entre eixercitos e países, seno tamién en es espacios mes intimos, siempre e mes que tot contra las mesmas victimas: las mullers. Ye una novela muit dura, aspra, pero con momentos de belleza e con el telón de fondo de la reivindicación de la rasmia, el corache e la supervivencia de las mullers etiopes, “de las que tanto es historiadors etiopes como es italianos s’heban olbidato”, seguntes sinyala l’autora.

David Forniès

Periodista, disenyador, tecnico d’Educación pa la Ciudadanía Mundial e bel·la cosa mes. Información internacional en clau de diversidat. Deleria per las luengas no-mainstream!