Comunicato de ro PCTE respective a ra mercantilización de ros espacios publicos

Mercantilizar y privatizar tot lo que sía posible. Ofrir cuantiosos beneficios a interpresas a costa de ros nuestros diners y ros nuestros espacios.  Fer-se muitas fotos y meter muitas luces.

Asinas poderbanos resumir rapidament a chestión neoliberal que ro PP de Natalia Chueca y previament de Jorge Azcón son fendo de Zaragoza, apostando por grans prochectos privatos en un modelo que busca mercantilizar y obtener beneficios economicos a tot trance.

Y no b’ha garra puesto como ro Parque Gran pa exemplificar-lo.

A primera gran polemica s’orichinó en sacar a licitación es kioscos historicos y entregar-los a franquicias de grans cadenas de restauración. Agora, en a zaguera vuelta de tuerca, s’ha instalato un espectaclo de luces (Luzir) por o cual se cobra una dentrata de mas de 10€ y por o cual una parti de ro parque queda zarrato por mes y meyo. Por si estase poco, ro recinto s’asignó a dido a ro mesmo chestor de ro Espacio Zity durant as fiestas de ro Pilar, a interpresa Zusup. Antis de seguir, una alvertencia: si yes leyendo esto y tenebas pensato ir-ie a vier-lo, u si ya b’has ito, este articlo no pretende atacar-te. Aquí lo que criticamos ye ra forma y ros intereses que mueven o espectaclo. Que ra suya razón de ser no ye ro de proporcionar un espacio de desfrute pa ros ciutadans, sino d’obtener una rendabilidat privata d’un espacio publico. Acaso no poderba haber montato ro Concello un espectaclo por a suya cuenta? No poderban haber feto un prochecto que s’integre en o parque, respectuoso con o ecosistema? Yera necesario encletar-lo d’esta forma? Qué parti d’ixos 10€ de dentrata va endrezata ta ro pago de ros costes y qué parti a ras superganancias de l’interpresario? Se poderba haber feto a pres populars, u mesmo de baldes?

A privatización y mercantilización de ros espacios publicos ye estando una constant.  Prochectos como este siguen a mesma lochica que l’aumento por tres de ras zonas d’estacionamiento regulato pa 2025, l’apuesta por macrofestivals como ro Vive Latino, u ro prochecto que quieren enchegar en es pinars de Venecia pa amplar o parque d’atraccions a costa d’uns de ros mayors pulmons de ra ciudat. Estas lochicas, as lochicas de ro capital, son china-chana asumitas como naturals y mesmo beneficiosas, y estes prochectos se van consolidando con a fuerza de ro paso de ro tiempo. Manimenos, no son naturals en absoluto. Requieren d’un treballo intensivo de propaganda y de destrucción de cualsequier alternativa que cuestione o modelo.

Charramos de ro zarre d’espacios comunitarios y autochestionatos como La Harinera, ro CSC Luis Buñuel u ro CSO Loira en un ataque a ro texito social que durant anyos han construyito ros vecins y vecinas. Estos centros ofrexen (u mas bien ofriban) espacios a ros suyos respectivos vicos do realizar actividaz y ocio aluenyatos d’una fin mercantil. Y ye per ixo, amás de por a suya autochestión popular, por lo que son siendo atacatos y desmontatos: por escapar de ras dinamicas de valorización de ro capital, constituyindo una alternativa a ra chestión de ro ocio y ros servicios que ro capitalismo nos ofrex.

Y ye que ra cultura, ra ciencia, ro esporte, ras artes y ro ocio en cheneral se troban sozmetitos a ro dictato de ro capital privato y totalment condicionatos por el.

Baxo pretextos como ro d’un plan d’inclusión disvrazan o zarre u ra privatización de toz estos espacios a l’empar que destinan cada vegata mas diners publicos a afavorir a ras respectivas interpresas y retallan en servicios socials fundamentals como ras Zonas Chóvens. Contra ixo, vecins y vecinas se mobilizan pa desfender es suyos espacios publicos y ro texito social construyito con tanto esfuerzo durant tantos anyos. Manifestacions debant de ro zarre de ros centros socials u replega de sinyas cuentra ro espectaclo nadalenco de luces son a respuesta de clase a estos ataques. Pero dillá de ra resistencia de ros vecins, mientres vivamos dentro de ro capitalismo ra tendencia a privatizar y ofrir nuevos mercatos a ra clase social que se lucra a ra nuestra costa siempre estará allí.

Por ixo dende ro PCTE queremos amostrar o nuestro mas absoluto refuse a esta dinamica privatizadera y dar tot o refirme a qui luitan cuentra ella en vegata que sinyalamos a ro sistema que s’apropia de ros nuestros espacios pa fer negocio a ra nuestra costa. Dende ra infancia dica ra viellera haberba d’existir un adecuato ret d’infrastructuras esportivas y culturals, centralment planificatas y de baldes, que aduyasen a aconseguir mayors libels de salut publica y de calidat de vida de ro pueblo y no pa ro beneficio d’uns pocos.

Y pa ixo ro primer paso ye desfender ro texito social de ros nuestros vicos, es nuestros parques y ros nuestros espacios publicos.

NO A RA MERCANTILIZACIÓN DE ROS NUESTROS VICOS

POR UN OCIO POPULAR