O vinient sabado 21 d’aviento a las 12:00 horas se ferá en Graus o estreno d’o documental Semillas.

Tres chovens creadors, tras l’exito d’a suya primera pieza, Donde Quisimos Vivir, mos trayen a historia d’as familias de Caneto, qui, o zaguer anyo, habioron de vivir a incertidumbre d’o suyo futuro dimpués de que se zarrase forzosament a escuela.

Semillas ye un documental que conta la luita d’o lugar de Caneto por mantener vivo lo suyo fogar.

As familias de Caneto han de lidiar con l’anuncio por parte d’a Administración, d’a tancadura imminent d’a escuela, estando ixo un trepuze en os prochectos de vida de a saber de familias y veyendo-se obligaus a actuar a escape pa evitar de todas lo fin d’o suyo prochecto de repoblación.

Habrán de travesar un proceso chudicial compleixo y embarrau en o suyo camín pa lograr
que la Administración en vaiga a buenas y cambie la intención de tancar o prochecto que ha
conseguido tornar a plenar de vida este chicot rincón d’o castigau Pirineo aragonés.

A traviés d’a mirada d’as suyas chents, Semillas amuestra cómo se vivió lo proceso, la importancia d’a repoblación dende la educación y cómo combatir con meyos propios a desengrasada maquinaria administrativa que tan poco se comprende y tanta malagana fa.

Semillas traye la mirada natural y sana d’as personas que reviven os nuestros lugars y saca a relucir o mal causado por o fango politico a una población que quiere vivir poquet a poquet más luen d’ixo.