Carlos Ojeda Falcón ye miembro de ro Buró Politico de ro Comité Central de ro Partito Comunista de Venezuela, reelechito en o XVI Congreso Nacional en noviembre de 2022. Tamién ye Secretario Nacional d’Ideolochía de ro Comité Central y actual Director Cheneral de l’Instituto d’Altos Estudios Bolívar-Marx (IAEBM). Dende Nuevo Rumbo han tenito ra oportunidat de charrar con él sobre ros zaguers succesos en Venezuela.

NR: En primeras, gracias per atender a ros lectors de Nuevo Rumbo. Pa meter en contexto a qui son leyendo esta entrevista, nos poderbas comentar en qué momento politico se troba hue ro día Venezuela? A qué dificultaz han de fer frent o pueblo y ra clase obrera?

C. O.: Enfrontinamos una complexa situación de incerteza, con una perda crexent de credibilidat en as institucions publicas de ro Estato venezolano, producto de l’actuación irresponsable de ro poder electoral, que dica hue no ha publicato ros resultatos d’escrutinio desagregatos mesa per mesa y no ha realizato ras auditorías de control posterior previstas en a lechislación electoral. Toz dos fetos obchectivos crean en a subchetividad de ro pueblo dudas razonables sobre ra lechitimidat de ros resultatos anunciatos per l’organo electoral o pasato 28 de chulio, yasía que per agora estos no son verificables.

En este escenario, ras competencias de ro poder electoral las ha venito exercendo ilegalment a Sala Electoral de ro Tribunal Supremo de Chusticia, que ha ratificato per medio de sentencia ra supuesta victoria electoral de Nicolás Maduro. Ye icir, tota ra voluntat popular exercita masivament per o pueblo ro pasato 28 de chulio ha estato conculcata per a voluntat chudicial de cinco machistratos, sin duda una feta grieu de tot que profundizará ra crisi politica, institucional y social en o nuestro país.

A esto se le suma ra detención masiva de mas de 2.000 venezolanos que, dimpués de l’actuación irresponsable de ras autoridaz electorals y chudicials, manifestoron a suya protesta en a carrera y en l’actualidat continan privatos de libertat y sin guarencias a ros suyos dreitos humans fundamentals. Esta ye ra situación actual.

A clase obrera venezolana sufre ro mayor impacto de ra crisi, yasía que ros salarios estioron destruyitos per o Gubierno como basamento esencial d’una politica economica de corte neoliberal que beneficia ampliament l’acumulación de capital especulativo y parasitario burchés, con predominio en as relacions socials de producción capitalista, dependients y rentistas venezolanas que sirven a l’imperialismo y mantienen en estato de postración as fuerzas productivas nacionals.

NR: Agora que conoxemos millor o contexto politico, dica qué punto tien responsabilidat o Gubierno de ro PSUV en esta situación y cuál ye ro suyo papel en l’actualidat?

C. O.: A responsabilidat ye compartita entre ros dos bloques burcheses de ra polarización politica. A dreita tradicional, con a suya erratica politica de presión internacional y sancions extrancheras, que nomás sirve pa que ro bloque burchés en o poder chustifique ro suyo achuste antipopular y ra feroz represión cuentra ra clase obrera. Pero, en particular, o Gubierno de ro PSUV personifica ra negación de tot cuanto chustificó y sirvió d’empentón a ro prochecto politico orichinal de carácter popular liderato per Chávez. Ye icir, s’ha completato una especie de chiro en contrario a ras acullas de reloch de 180° do ro PSUV-Gubierno ha esdevenito en enstrumento de destrucción de ro suyo propio prochecto politico orichinal plasmato en a Constitución de 1999. Son éls es responsables directos de ra involución de ro proceso de cambios que durant anyos contó con un amplio refirme popular.

NR: A prensa de ro nuestro país prencipalment se fa eco de ros opositors a ra dreita de ro Gubierno; manimenos, sapemos que ro Gubierno venezolano ilegaliza a partitos opositors, incluyindo a cuantos partitos y organizacions de ro cambo obrero y popular. Podez amplar a información en este sentito?

C. O.: En Venezuela, ros prencipios constitucionals que orientan o proposito de construyir un Estato social de dreito y de chusticia, basato en l’exercicio pleno y corresponsable de ra democracia participativa y protagonica han estato desmontatos, d’astí l’ausencia dende fa mas d’una década d’esleccions per a base en o sino de ras organizacions socials de ro pueblo, plegando a l’autoritaria realidat en a cuala ra vida organica de ros partitos politicos ye intervenita per acción de ro poder chudicial con o proposito de dividir-los, sozmeter-los y subordinar-los a l’interés d’a elite gubernamental. Perversa practica que ha tocato a partitos politicos que comprenden o espectro ideolochico que va dende ra dreita opositora dica ro Partito Comunista de Venezuela (PCV).

Manimenos, o nuestro partito mantien tota ra suya estructura nacional en funcionamiento apegato a ros prencipios leninistas d’organización y en estricta observancia d’Ordinacions vichents, en que ro suyo marco realizamos a recient XVI Conferencia Nacional. O verdadero PCV no podió estar aislato meyant a puerca y ilegal maniobra politica instrumentata dende ro poder chudicial. A existencia d’una verdadera organización comunista nunca será en dependencia de ra legalidat d’un Estato burchés.

NR: Es ataques enta ro PCV producioron muito eco dentro de ro movimiento comunista internacional. O nuestro partito ha prestato ra suya voz en defensa de ro vuestro partito y vuestros militants. En qué situación se troban actualment?

C. O.: O nuestro partito resiste y impulsa ra linia politica trazata per es suyos organismos. O PCV enfrontina en a practica a un Gubierno que ha ordenato per vía chudicial a suya usurpación y secuestro pa entregar-le-ne a un grupo de malfeitors politicos y, asinas, asegurar en o tactico-conchuntural o refirme a ra candidatura presidencial de Nicolás Maduro y, en l’estratechico, privar a ra clase obrera de ro suyo dreito a ra organización politica legal. Una innovadera practica de tipo anticomunista propia d’un Gubierno reaccionario que sirve a l’imperialismo y ros suyos patrons burcheses.

En este contexto, treballamos per a nuestra defensa legal, a preservación de ros nuestros cuadros y activos, a ro tiempo de neutralizar l’acción isolacionista pretendita per o Gubierno-PSUV que ro suyo fin ye limitar u anular o nuestro activismo politico. No l’han aconseguito y no lo podrán aconseguir.

NR: Como decíbanos anteriorment, en Espanya l’actualidat venezolana ocupa multitut de menutos en es telediarios de toz es meyos d’información que, per un costato, critican a ro Gubierno y, per unatro, aponderan o papel de ra oposición. Qué le diríaz a un treballador u una treballadera espanyola que recibe esta información diariament?

C. O.: Es meyos de comunicación en Espanya, como en a mayoría de ros países capitalistas, estrucan a información en beneficio de ros suyos aliatos politicos en Venezuela, que son es partitos que aconforman o polo de ra burchesía tradicional. Sapemos tamién que en o cambo de sectors progresistas y de zurdas se fa ro contrario: tiende a reproducir-se ra narrativa gubernamental cargata d’un falso discurso revolucionario y antiimperialista, con o que se pretende chustificar as atrocidaz que comete este atro polo burchés, cuentra ros dreitos laborals y ras libertaz democraticas de ra clase treballadera venezolana.

Lo que queremos expresar-le a ra clase treballadera d’Espanya ye que priven de cayer en este chuego miope de ra falsa polarización politica, que busca amagar o carácter de clase de ras fuerzas politicas que se disputan o poder en Venezuela, y enfaxonar a ro pueblo habendo de triar entre uno u unatro polo burchés.

A clase treballadera en Venezuela tien es suyos propios intereses, y no se corresponden con o programa que impusa ro Gubierno de ro PSUV, ni con o que devantan es partitos de ra dreita tradicional. Dende l’anyo 2020, que se fació evident o pacto d’elites entre ros interpresarios d’estes dos grans bloques politicos, quedó contrimuestrato ro carácter irreconciliable de ros intereses de ra clase treballadera venezolana con estes dos polos reaccionarios.

D’astí ra politica de ro PCV de construyir, de conchunta con atras fuerzas revolucionarias de ro país, una alternativa politica dende ro cambo obrero y popular a ros dos bloques burcheses hechemonicos. Este proceso d’acumulación de fuerza no ye solo invisibilizato per es grans meyos de comunicación, Gubiernos capitalistas y partitos reaccionarios en o mundo; tamién ye obchecto d’una feroz persecución per parti de ro Gubierno venezolano a ro interno de ro país.

Creyemos que ros partitos comunistas y ro movimiento obrero a libel mundial haberban de refirmar a ra clase treballadera venezolana en a suya luita per construyir una fuerza alternativa independient a ros dos polos burcheses, expresando ra suya solidaridat y condenando ros sistematicos ataques a ros suyos dreitos politicos y democraticos.