O zaguer viernes se podié sentir tronar, literal y metaforicament en a capital ribagorzana con a chornada organizata por Tronada Ribagorza.

O mal orache no privó de que se faciesen os conciertos programaus que empecipiaoron con La Ronda de Boltanya, que con o suyo mensache embrecau, dioron animos a la choventut present pa continar dando ferrete con a causa d’esfensa d’o territorio, cultura y luenga aragonesa.

Dimpués se fació un bingo y una rifa con productos d’o país y voces de SOS Ribagorza y Vivienda digna Benás puyoron ta l’escenario pa reivindicar o modelo de turismo, vivienda y territorio enta el que vamos.

La Cara B de Uesca metió su rap canyero con a suya rima mestiza d’entre diferents puestos de l’alto Aragón y Au d’astí remató los conciertos con o rock trabucaire que fació brincar a totas y toz os asistents, enchegar bengalas y ondear as cuatribarradas.

DJ Gilahz punchó buen mezclallo de temas pa los tardanos y tardanas que querioron alargar a nueit, baixo la mirada d’o suyo companyer Merio que estió present en o ricuerdo y en una pancarta entre que duró tot l’acto.

As bieras Ordio y Rondadora estioron tamién presents y casi fendo corto pa dar de beber a tota la chent que podió estar-ie.

Exito en o primer acto de Tronada Ribagorza, que ye de seguras, primero de muitos que fan a chovenalla en luita d’una tierra tan embrecada como esta.