Crisi electrica en Cuba: A cara amagata

Economía, Internacional, Opinión, Politica

25 de octubre de 2024

3–4 minutes

José Manzaneda, coordinador de Cubainformación.- O Departamento de ro Tesoro de ros EUA enresta y sanciona a ras navieras que levan combustible a ras centrals termoelectricas de Cuba (1).

Enresta y sanciona a tot bango internacional que gose realizar transferencias d’institucions cubanas u atorgar creditos pa ro pago de suministros (2). As sancions de ros EUA acaboron, en cinco anyos, con o 90 % de ra producción petrolera de Venezuela, antes mas prencipal subministrador de combustible a Cuba.

Amás, a Casa Blanca ha aconseguito impactar totas y cadaguna de ras fuents d’ingreso de divisas de Cuba: o ninvio de remesas de ra emigración cubana estió prohibito durant mas de tres anyos (3); o turismo europeu a Cuba ha caito per penalizacions de visato, entre que ro estausunidenco sigue embarracato (4); y l’aplicación integral de ra Lei Helms-Burton ha tallato de ranquete o fluxo d’inversión extranchera a Cuba (5).

Anyadamos a tot esto l’encarimiento de totas as importacions cubanas per o tradicional embargo comercial de ros EUA; as penalizacions y presions a interpresas y países que comercien con a Isla; u ra imposibilidat que Cuba acceda a creditos pa ro desenrollo, pa modernizar, per exemplo, ro suyo sistema electrico, a causa de ro voto preferent de ros EUA en o Bango Mundial u ro Bango Interamericano de Desenrrollo (6).

A crisi electrica que sufre Cuba ye consecuencia de ra suma d’estos elementos. Pero no trobarán ni una sola mención a éls en a prensa corporativa internacional. Una parti d’esta prensa, nos describe ra situación cubana tal como ye, sin duda (7). Una realidat dramatica, limite, insostenible. Pero, y de ras causas, de ra politica criminal que ha conducito a esta situación (8)? Ni una silaba (9).

Unatra parti de ros meyos prene partito… pa avalar o crimen. Ye ro caso de ro diario “El País”, que ra suya especialista en o tema Cuba ye Carla Gloria Colomé qui, dinantes, treballó a sueldo de ro Gubierno de ros EUA en o meyo “El Estornudo” (10) (11). Nos charra con suficiencia de “decenios de falta d’inversión”, d’un “sistema electrico obsoleto” que “depende encara de ros combustibles fosiles”, como si esto estase una decisión burocratica u caprichosa de L’Habana (12). Tot, pa tapar a guerra economica imposata per o Gubierno que pagó ro suyo salario durant anyos.

Unatro meyo espanyol, “El Confidencial”, menciona belas razons de ra crisi (13). Una, ro petrolio venezolano. “Caracas ya no ye capaz de ninviar a L’Habana ni ro 50%” de ro que ninviaba, nos diz. Pero, per qué no explica que ya no ro puede fer perque ro bloqueyo de ros EUA acabó con o 90 % de ra suya producción y de ros suyos ingresos (14)? Dos, o turismo. “O rechimen cubano ha perdito gran parti de ra suya liquididat financiera a causa de ra decadencia de ro turismo, una de ras suyas prencipals fuents d’ingresos”. Pero, per qué calla sobre una de ras razons fundamentals, a penalización de ros EUA a ros turistas europeus que visitan a Isla?

Silenciar a guerra economica que sufre Cuba ye ra unica forma de chustificar-la, y asinas endosar as suyas consecuencias a “65 anyos de chestión comunista” u a ra “centralización economica” (curiosament, cuan esta ye menor que nunca en a historia, dimpués d’un proceso d’obridura a ro sector privato) (15).

Y, en tot esto, b’ha meyos que ya dexan cayer a siguient linia d’ataque: a supuesta represión. L’alvertencia de ro president Miguel Díaz-Canel que no va a permitir “fetos vandalicos”, aprofitando ro apagaz, d’ocurrir en unatro país, serba narrata como l’actuación normal d’un Estato en defensa de ras propiedaz publicas u privatas. Pero si ye en Cuba ra cosa cambia: se nos diz que “O rechimen (…) menazó con aumentar a represión en cuentra de qui protesten” (16) u que “ro Gubierno advierte que no tolerará protestas” (17).

O pueblo cubano sufre una guerra despiedata, con o aval de ros meyos internacionals. Una guerra que nunca heba aconseguito semellant intensidat. Per ixo, ye necesario activar, mas que nunca, ra solidaridat de ro mundo entero. Pa aturar es piez a ros criminals… y a ros suyos organos de propaganda (18).

Leave a ReplyCancel reply

O Dichital se’n va, pero no rebla

Esferra y, catarsi?

Camín ta 1ª REF

Tendencias

O Dichital se’n va, pero no rebla

Esferra y, catarsi?

Camín ta 1ª REF

Empace con polemica en Leyón