(Resolución de ro PCTE Aragón)

A situación de ra vivienda en o Pireneu aragonés parexerba insostenible si no estase perque ra necesidat que nos mueve como traballadors nos ha feto suportar muitas cosas, dica agora. As consecuencias d’una apuesta economica excloent y descarnata per o turismo de temporatas en o Pireneu, igual que en atras partes d’Espanya, las sufren es traballadors y traballadoras con condicions laborals precarias y falta d’acceso a una vivienda digna.

A realidat laboral d’estas comarcas dista muito de ros paisaches bucolicos que cada temporata ra publicidat nos quiere fer vier. Nos trobamos debant d’una elevata taxa de temporalidat derivata de ro turismo de temporata, lo que dexa a una gran masa de traballadors en a carrera en primavera y agüerro, no trobando estes garra alternativa d’emplego, ya que atros sectors como l’industrial son testimonials u dreitament no b’existen.

L’atra cara d’esta moneda macabra ye l’acceso a ra vivienda. Y ye que l’atro “gran negocio” en esta rechión pasa per destinar o parque de viviendas a uso turistico con loguers per temporata u días. Esto ha provocato un encarimiento desorbitato de ros pres de loguero, que amás imposibilitan una estabilidat anyal pa ros residents de ra zona. Un dreito basico como ra vivienda, como en muitos atros casos, se veye tustato/latiguiato per considerar-se “bien de mercato”, y destinar-se a l’enriquimiento de cada vegata mas rentistas que nos parasitan. A zaguera y mas vergonyant consecuencia de tot ixo, ros desfiuces, que han aumentato drasticament en es zaguers tiempos y escenifican millor que cosa ra desgracia de muitas familias frent a ro beneficio de grans tenedors y inversors.

A solución no ye sencilla ni immediata, pero como tot en a vida, ixo nos da certeza de ra suya eficacia y irreversibilidat: una sociedat en que ro turismo no sía ra rueda precaria y temporal que mueva ra economía de ros nuestros Pireneus, y que ra vivienda no sía una mercadería, sino un dreito pa toz. Pero dinantes, pa plegar a ixa val, cal recorrer un viero. Uno espinoso y angosto.

Per ixo, dende ro PCTE cridamos a ros traballadors y traballadoras aragonesas que sufren esta explotación y carestía de vivienda a que organicen un movimiento de protesta contundent debant d’esta situación d’escasedat extrema de vivienda que naxca de ros vicos y lugars y que no aparte nunca ra mirada de ro verdadero y zaguer culpable d’esta situación que no ye unatro que ro sistema en o cual nos ha tocato vivir, o capitalismo.