Dende ro movimiento ciudadán Salvemos Guara Nordeste convidan a colaborar pa protecher ro Parque Natural de ra Sierra y ras Foces de Guara de ra carretera que quieren construyir.

Un prochecto que no tien chustificación social y que posiblement estase ra puerta de dentrata d’un turismo masificato que no aporta a ro territorio ni contribuye a conservar as valuras que lo fan unico. Adchuntan una sucherencia d’alegación pa ninviar a ro gubierno d’Aragón. S’endrezan a ro gubierno d’Aragón, acullindo-se a ra recientment aprebata Lei de Restauración de ra Naturaleza, pa expresar o suyo refús a ra construcción d’una nueva carretera entre Bara y ras Bellostas, perque esta infrastructura arruinará un parache d’una enorme riqueza natural per as suyas caracteristicas unicas, ya que ro sector Nordeste de ra Sierra de Guara ye ro mas salvache y deshabitato de ro Parque Natural.

Cosa podrá restaurar-lo si se permite que s’estricalle d’esta traza. Amás, esta costosa infrastructura no responde a garra demanda ni necesidat social que la chustifique, sino que per cuentra ye estando promovita per intereses privatos que suposarban una explotación turistica masificata y no sostenible d’este valuroso espacio natural.

Piden que si s’alega se les faiga saper en o correu salvemosguara@gmail.com asinas como cualsequier sucherencia, ideya u iniciativa que se piense que puede aduyar a salvar Guara d’este desproposito.