D’o 19 t’al 20 d’otubre se fará un anyo más, o festival cuentra la despoblación en Allepuz (Teruel), celebrando a suya VI edición.

Dende la organización, Asociación Cultural Escurzón de Allepuz, acobaltan como novedat pasar de cuatro a sais conciertos en a tardada y nueit d’o sabado. D’esta traza, amplan tanto en cantidat como en variedat a oferta musical, en respuesta a la gran acullita d’un publico diverso en zaguers edicions, sin oblidar a naturaleza embrecata d’o festival, engrandando tamién o tiempo d’a participativa mesa redonda que ubrirá la manyana d’o sabado.

Se i meten tamién como novedaz, un mercau artesanal con
artesanos y artesanas d’o país y a programación de diversas actividaz culturals y mosica dende la tardi d’o viernes, incluyindo por primer vez danza.

O festival ye d’entrata de baldes y contará con servicio de cenas y zonas d’acampada y camper gratuitas.

Será a las 19h d’o viernes 18 cuan empecipie la edición en o local social d’o lugar, con una variata oferta cultural. Hugo Casanova presentará lo mural
conmemorativo d’a edición, rematando con él o muro d’a A-226 present a la altura d’o lugar, y que ha tardau 3 anyos en plenarse de color con diferents murals artisticos.

A la media pa las 20h a bailarina arradigada en Toulouse, Francia, Izaskun Insausti, ferá por primer vez en Allepuz un solo de danza contemporánia. Con ixo, se mete en o festival una disciplina de gran valor artitico, desconoixida en o municipio y garra habitual en a provincia de Teruel.

Soñando un Lugar, estará la pieza documental proyectata. Esta opera prima de Alfonso Kint, narra la suya propia historia personal en a suya decisión, chunto con a suya parella, Lucía Camón, de ficar radices en Torralba de Ribota, Zaragoza, dixando dezaga lo caos madrileño.

En lo musical, estarán os de Gasteiz, Old Time Spooks, quiens ranquen con os primers acordes d’o festival. Una colla de spooky hillbilly punk naixoda en as carreras de Euskal Herria.

As paredes d’o local albergarán a exposición Proyecto Cuerpo Natura, de l’artista de Binéfar, María Mateo. Una obra feita por fotografías en as que lo cuerpo humano se chunta en l’entorno natural, reflexionando sobre la importancia de tornar ta l’orichen.

Ya lo sabado, ubrirá la manyana atra d’as novedaz d’esta edición. Dende las 10h se podrá vesitar o mercau artesanal, ubicau en o patio d’as escuelas.

A las 11h se celebrará la habitual y fundamental mesa redonda, duplicando a suya duración a dos horas pa que lo publico pueda intervenir en mayor profundidat si así lo desea. La mesa estará moderata por o periodista y amigo d’o festival, Chema López Juderías.

A las 12.00, Bengala Circo y Teatro ofrecerá una actuación familiar, contina d’a famosa agrupación Tambors de Teruel.

Dimpués ye programata la chenta popular, que une a publico, organización, artistas y atras personalidaz convidatas, estando uno d’os intes más caracteristicos d’o festival.

A las 16.00h. Ixo Rai! y Paco Medina ubrirán o telón musical de l’escenario, ubicau en a carpa cubierta d’a plaza d’o lugar. Una trobada musical que os vecins y vecinas de Allepuz acullioron con especial carinyo en a
presentación d’o cartel.

Dimpués d’els, a catalana Alidè Sans ferá relevo con a suya caracteristica vitalidat y enerchía. L’artista contribuye con as suyas letras a la difusión d’a luenga occitana-aranesa, asinas como a esfensa d’o mundo rural y natural o l’empoderamiento femenino. 

Al rematar, en a plaza y arropaus por o publico, tanyerán Tambores de Teruel, con un espectaculo de percusión tradicional tremendament emocionant.

La representación turolense d’esta edición será por parti d’os raperos Chocabeat. Con este grupo, present en a escena turolense dende 2014, o festival retoma o chenero, ya que dende la primer edición no heban tornau a contar con un grupo esencialment de rap.

O capeza de cartel ubrirá la nueit. A las 21h, la agrupación de Montcada, Itaca Band, plenará lo recinto con su caracteristica fiesta. Reconoixidos por a suya iconica efusividat y o suyo estilo, que fa mezclallo ska, reggae, punk y latino, fan un mix perfecto pa celebrar a mosica en directo. A ormino en festivals nacionals e internacionals y con una considerable trachectoria, paran en Allepuz pa formar parti d’esta celebración por o mundo rural.

Mallazo estará l’encargau de continar la nueit. A banda, naixida en Monzón en 2019, explora y chuga diferents estilos musicals, sin abandonar a esencia d’o rock como protagonista. Rock lúdico festivo como els mismos en dicen.

A rematadera d’os conciertos lo pondrá Awakate. Dende su Murcia Tropical, comparten os valors con o festival d’esfensa d’o territorio oblidau y maltratau estatalment. A suya mosica fa mezcla lo urbano, lo latino y lo electronico. Nomás tres anyos dende a suya naixencia, estricallan a industria musical apostando por a reivindicación a traviés d’o baile, a fiesta y a suya tierra.

Dj Luna Roja, reconoixita impulsora d’a cultura DJ en Aragón y habitual en a pista de baile de festivals como Pirineo Sur, puyará ta l’escenario pa fer bailar a lo publico y rematar con ella lo intenso día viviu en Allepuz.

Pa los amadrugadors, estará la tradicional gambada popular o dominche a las 10h, con salida en a plaza prencipal d’o lugar.

Más información en Instagram @festivaldespoblacion.