L’11 de setiembre ro Concello de Sallent de Galligo presentó a ros vecins o prochecto de “Peatonalización y adecuación de ra plaza Val de Tena”, en o cual se pretende levar a cabo un aparcadero subterranio d’unas 60 plazas y ra peatonalización de ra plaza. A exposición chenera refuso ya que se presienta una plaza diafana, sin árbols, sin garra sinyal de ra identidat u historia de ro lugar, sin cosa que lo represiente como un puesto de ra montanya pirenaica, poderba estar una plaza de cualsequier gran ciudat.

Y encara mas sorprendent o plantiamiento d’un aparcadero debaxo de ra plaza con tan pocas plazas que, amás de no solucionar o problema d’aparcadero en as epocas de gran afluencia turistica, no parexe compatible a peatonalización con ficar es autos en o centro de ro lugar. Preocupa muito ra duración de ras obras, serban cuasi 2 anyos d’impacto grieu en a economía comercial y hostelera.

Vecinas y vecins que no quieren a plaza convertita en un aparcadero, con vehíclos dentrando y salindo entre tot o día,  y que sía vuedo en as temporadas baxas han escomencipiato una replegada de sinyals (que en 3 días ya en tien mas que ro 50% de población de ro lugar), quieren una plaza pa vivir-la, pasiar-la, pa ro mercato local, que ros vesitants desfruten d’una experiencia sensorial pasiando per o lugar sin autos y desfrutando d’una plaza viva, disenyata pa ras personas.

Proposan que l’aparcadero se sitúe en a dentrata a Sallent, enamplando y amillorando ros que ya existen, con una ubicación y accesos excelents y a 5 menutos caminando de ro centro de ra localidat.

Per ixo, piden a ro concello que tratando-se d’un prochecto que cambiarba ra fesomía y ra dinamica de mobilidat de ro lugar d’una forma tan profunda, ature este prochecto y treballen en trobar una solución a ra regulación de l’aparcadero en o lugar.