O debat sobre ras consecuencias de ro modelo turistico ye muito necesario, pero conviene no perder l’enfoque: o problema no ye ro dreito a ro descanso de ra clase obrera, sino ra suya mercantilización en beneficio de poc@s.

O dreito a ro descanso y a ras vacacions pagatas ha estato una reivindicación historica de ro movimiento obrero, siempre vinculata a ro dreito a ra salut fisica y mental y ra reducción de ro tiempo de treballo. A luita per mas tiempo pa nusatr@s y no pa r@s capitalistas.

Una reivindicación que sigue plenament vichent. Cualsequiera que conoxca una mica ro movimiento obrero y sindical sape que ros tiempos de treballo, descanso y vacacions son caballo de batalla permanent, cuasi mas que ras propias cuantías salarials.

O problema surche cuan, pa ro desfrute de ras vacacions, nos veyemos obligatos a dentrar en a lochica de consumo mercantil data ra inexistencia de mecanismos que guarencien dito desfrute. U pagas (cada vegata mas), u ras vacaciones las pasas en o salón de ra tuya casa.

Y astí ros capitalistas fa tiempo que troboron un gran nicho de negocio, hiperexplotando per o camín a fuerza de treballo, ro medio ambient y ros recursos naturals per dencima de cualsequier limite imachinable.

Igual que pasa con o sector primario u ra industria fabril, a industria capitalista de ro turismo consume masivos recursos humans y naturals pa guarenciar as ganancias d’un zarpato de propietarios, de vegata que socializa ras consecuencias que este modelo suposa.

A busqueda permanent de mayors cotas de beneficio, lochica intrinseca de ro capitalismo, ha traito como consecuencia que ro turismo per cada vegata sía mas inaccesible, de pior calidat y chenere cada vegata mayors problemas economicos, socials y medioambientals.

B’ha puestos que per a suya ubicación cheografica, condicions climaticas, valor historica, etc. tienen un innegable interés turistico. Ixo no va a cambiar. A cuestión ye a ro servicio de quí se mete tota ixa valor, si a ro beneficio d’uns pocos u a ro descanso de ra mayoría social.

Situar o foco en que r@s madrileny@s “invaden” Sobrarbe u que r@s basc@s “ocupan” o Viello Aragón ye exonerar a r@s capitalistas de ra suya propia responsabilidat, sembrando a división xenofoba per o camín y ignorando ra radiz de ro problema: o modelo capitalista de producción.

Analisar es problemas que chenera l’actual modelo turistico sin charrar de ra concentración poblacional en grans urbes, as condicions de vida y treballo, ros problemas medioambientals, etc. y reducir-lo tot a “esta terreta ye mía” ye, como poco, d’una profunda ignorancia.

Luitemos per reducir a chornada de treballo, chubilacions mas tempranas mas descanso y mecanismos que guarencien o pleno acceso de ra población a ro desfrute de ras vacacions. Luitemos per mas dreitos pa totas y toz y no per o privilechio de poc@s.

Recomiendo leyer a recient resolución de l’Acción Comunista Europea a proposito de totas estas cuestions.