O pasau 10 d’agosto, poco dimpués d’as 23 horas y baixo un cielo iluminau por as glarimas de sant Lorient, rancaba en Biescas o concierto d’Au d’astí!

licencia cc-by-sa 4.0 y autor Willtron

O grupo de moda en o panorama musical aragonesofablant logró emplir con o suyo “rock trabucaire” o patio d’as escuelas, pleno a rebutir de chent. Tanto os seguidors mas fidels d’o grupo, como locals y turistas de todas as edaz facioron parti d’a borina. L’ambient de fiesta se sentiba ya en a villa.

Estió con belunas d’as suyas cancions mas quiestas como “Puya”, “Entavan” u “Arriban Festas” cuan un publico, ya vulcau, lo dió tot, pretando literalment fuego a ixa nueit tan machica y especial. I habió un homenache a Ixo Rai! y Labordeta a traviés d’a suya canción “Un País”, rematando o concierto con un emotivo “Olvidar” y un mensache de luita contra a despoblación d’os lugars.

Letras reivindicativas

Dende lo punk-oi! dica o rock and roll, Au d’astí! tiene un estilo muit personal, con un soniu potent y tamién unas letras combativas. A esfensa d’o territorio y d’o mundo rural son temas que se troban en as suyas letras, escritas en aragonés y catalán ribagorzanos y en castellano.

Se demandó dende lo escenario la oficialidat de l’aragonés, asinas como la protección d’a Canal Roya, un tema muit present en a val.

Guillermo Frías Marín