El de Baluchistán ye un d’es conflictos mes prolongatos d’el mundo. Son ya tres cuartos de sieglo de luta armata intermitent per part de numbrosas organizacions baluchis, e de represión feroz e persistent per part d’Irán e Pakistán, es dos estatos que se reparten el noventa per ciento d’el territorio de Baluchistán. Ubicato en una cruz cheopolitica de primer orden, debant la suya costa pasa la rota maritima que une l’Orient Proximo e lo Leixano Orient, una de las principals de tot lo mundo. China ha invertito mes de 60.000 millons d’euros pa construyir un puerto a Gwadar, infrastructura d’el Corredor Economico China-Pakistán, pieza clau pa garantizar el subministro enerchetico d’el chigant asiatico.

Con ixo e con tot, Baluchistán ha mereixito mutisma menos atención mediatica que altros escenarios d’el suyo entorno amplo, como Cachemira, Kurdistán, Afganistán —que ocupa el diez per ciento restant de tierra baluchi— e, ya no diciamos, Iraq. De feto, per un regular es periodistas no se i aventuran pas. No ye el caso de Karlos Zurutuza, reporter basco que ha pisato es tres cabos en es que ye dividito este país sin estato e que se i ha entrevistato con dirichents, activistas e guerrillers. Ara nos ofreix Una trinchera en Marte. Historias de Baluchistán (Libros del K.O., 2024), obra de lectura amena e clara que nos permite de capuzar-nos en este país tan dur e captar, a la par, la suya importancia estratechica e la gravedat de las conculcacions d’es dretos que i ocurren.

El libro comencipia presentando-nos el Baluchistán como un país que existió como estato (el kanato de Kalat, que arribó a estar independient a’l seguito de la partición d’India) e el contraposa implicitament con la invención de Pakistán en a ment de Choudhry Rahmat Ali, qui mientres paseyaba a’l costato d’el río Tamisa en 1932 s’esmaixinó la existencia d’esta futura potencia nucleyar. Seguindo este fil, Zurutuza nos fa a viyer cuantos aspectos de la historia e actualidat de Baluchistán, a menuto a traviés d’historias de personas que er ha conoixito en este vasto país asiatico u en l’exilio.

Asinas, nos enteramos de la existencia d’una miriada de grupos armatos baluchis en Pakistán, que miran la independencia per la vía violenta, e tamién de cuantas iniciativas asociativas e chovenils que exichen el respeto ta’s dretos humanos mes basicos. Un d’es aspectos mes greus que recorren el libro ye la cuestión d’es desapareixitos. L’asociación Voice of the Baloch Missing Persons calcula en milars e milars es baluchis que desapareixen sin deixar sinyal, en as mans d’es servicios secretos pakistaneses u grupos subcontratatos. La impunidat ye cuasi total. La opresión contra las mullers —a qui las mesmas familias miran d’invisibilizar per cuestions “d’honor”—, es efectos gravismos de cuantas prebas nucleyars pa la salut de milars de personas u las condicions de vida infernals pa’s cientos de milars de desplazatos e refuchiatos baluchis son altros aspectos que el libro resenya e eixemplifica con nombres, apellitos e toponimos.

Las cosas no milloran pas a l’altro costato de la buega. En Irán, el libro repasa la politica intencionata e sistematica d’el rechimen d’es ayatolás de mantener Baluchistán en o subdesarrollo —el setenta per ciento de la población i vive debaixo lo branquil de la pobreza—, d’implantar-ie un estato de terror a traviés d’execucions masivas e de la violencia de las fuerzas de seguridat e grupos paramilitars, e de destruyir el futuro colectivo d’es baluchis permetendo e mesmo fomentando que el sesenta per ciento d’ers sían drogodependients.

Zurutuza torna a exhibir, en este volumen, bel·la caracteristica principal de la suya obra como reporter, que hemos puesto seguir en libros anteriors como Tierra adentro (2018, sobre Libia), u Respirando fuego (2019, sobre Kurdistán): l’habilidat pa transmitir-nos la relevancia de las historias personals de mullers e hombres —con un interés marcato per las de migrants e refuchiatos—, la sensibilidat enta’s suyos dretos e necesidaz, e el suyo conoiximiento fondo de las minorías mes ignotas. E, asinas, en Una trinchera en Marte, l’autor nos presienta grupos como es zikris afrobaluchis u es baluchis turcomans de la rechión de Marv.

El libro que nos ofreix Zurutuza ye, per tanto, una obra imprescindible pa acercar-nos a un d’es pueblos mes increíblement ignoratos d’el planeta sin haber a recorrer a monografías academicas u informes especializatos. A un publico no necesariament interesato en es pueblos sin estato, el libro tamién le fa honra: presienta una mirada diferent, dende las márguins, ta dos estatos tan importants como Irán e Pakistán.

David Forniès