Publicamos contino l’analisi de ro PCTE sobre ro sector educativo en Aragón

Este chunio concluyió un curso marcato per numerosas polemicas vinculatas con o sector de ra ensinyanza en Aragón. Cualques d’ellas son recients y atras vienen de largo, pero ra situación cheneral sigue estando de descontento debant d’una precariedat crexent, as cada vegata mayors retalladas y ra primacía de ra interinidat.

Tot esto provoca que ra educación publica carexca de ros recursos necesarios pa guarenciar una ensinyanza de calidat a ros fillos y fillas de ra clase treballadera aragonesa, tot y con un nuevo alcuerdo aconseguito entre gubierno y sindicatos (a excepción de CGT) que, sobre ro papel, disminuye ras horas lectivas de ro profesorato y guarencia un moderato augmento de ro sueldo.

Cal mencionar, en primer puesto, que ra nuestra comunidat ye ra tercera per lo que fa a ro percentache de profesorato interino, un 40% de ro total. Esta situación provoca que numerosos profesors sapan cuál va a estar o suyo destín y de cuánto va a estar a duración de ro suyo contracto practicament con 24 horas d’antelación, lo que dificulta cualsequier tipo de planificación y conlleva numerosos problemas pa trobar una vivienda adecuata u organizar o transporte. Amás, es cambios constants de profesorato dificultan tanto ra organización y preparación de ras clases como ro establimiento de vinclos con es estudiants, importantismos en o proceso d’ensinyanza-aprendizache.

D’atra part, y tot y con l’alcuerdo mencionato, ros docents aragoneses siguen estando entre ros piors pagatos de ro país, a lo que se le anyade una important disminución de ro poder adquisitivo de ros miembros de ro sector a causa de l’alza cheneralizata de ros pres. Si a esto le sumamos ra ya comentata interinidat de numerosos treballadors de ra comunidat educativa, veyemos cómo ros gastos constants en transporte y aloch convierten a ra docencia en una realidat muito mas precaria de ro que puede creyer-se.

De feto, d’entre tot o cuerpo de profesorato talment es que mas han sufierto ro menosprez de l’administración son es dedicatos a ra ensenyanza en Formación Profesional. Ha pasato mas d’un anyo dende que s’encetó ro proceso d’integración d’estos profesors dentro de ro cuerpo de Secundaria, lo cual se traduciba en un augmento considerable de ro sueldo con efecto retroactivo dende l’anyo 2021. Manimenos, no s’ha encetato garra pago ni existen perspectivas que succeda a ro curto, entre que ro nuevo gubierno culpa a l’anterior de ra falta de fondos pa ixo.

A tot esto hemos de sumar que, conforme s’han ito conoxendo ros cupos de profesorato per centros pa ro nuevo curso, s’ha feto evident que l’alcordada reducción de ra chornada lectiva pa ros docents puede tener vinculata ra contratación de menos treballadors, especialment en l’ambito d’infantil y primaria. Per tanto, ro numero d’alumnos per clase augmentarba, feto que disminuye considerablement a calidat de ra educación y mas en etapas tan tempranas, ya que impide ro tracto personalizato a l’alumnado.

Manimenos, y tot y con as evidencias aquí mencionatas, veyemos cómo l’Executivo d’Azcón s’avanta de l’incremento de ra inversión en educación en 155 millons d’euros (un 11%) respective a ro curso anterior. Entremistanto, ros cuerpos directivos y ras familias d’alumnos pertenexients a numerosos centros publicos denuncian as retalladas en recursos humans y materials. Amás de ro problema de ros ratios d’alumnato per clase, han quedato plazas d’auxiliars d’educación especial sin cubrir, s’ha cabitato en a organización de ros tribunals d’oposicions a cuesta de ro buenvpasar de ros suyos components y mesmo sobrevoló ra ideya de retardar a calendata de contratación de ro profesorato interino a ro prencipio de ro curso lectivo, y no l’1 de setiembre como se feba dica agora.

Y ye que un percentache important d’este presupuesto ha estato destinato a centros concertatos, especialment aquels que imparten FP y han incrementato ras suyas plazas en es zaguers anyos, con o perchudicio que suposa pa ra educación publica. Con tot y con ixo, no ye necesario afondar masiato pa trobar entre docents de centros privatos y concertatos condicions laborals piors a ras de ros suyos companyers en a escuela publica, ya que tienen un mayor numero d’horas lectivas y ro suyo sueldo ye inferior. Ye evident que ra inversión de diners publicos no ha servito tampoco pa amillorar a situación d’estos treballadors, sino, en tot caso, pa la de ros chestors de ros centros.

Es y ras comunistas somos conscients que ra educación en o capitalismo, luen d’estar ixe ascensor social que beluns desfienden, ye un traste que sirve primordialment pa ra formación cada vegata mas hiperespecializata de ra man d’obra, pa adaptar a suya formación cada vegata mas a ras necesidaz de ro mercato en cada momento. As constants reformas en as distintas ramas educativas, la cada vegata mayor intromisión de ros intereses privatos y ro papel cada vegata mas protagonista d’estudiants en practicas lo contrimuestran. Entremistanto, personal docent y no docent veye cómo l’augmento de presupuesto se va a ras interpresas de ra concertata, cómo faltan recursos materials y humans, cómo ra organización vital ye una quimera si yes interino/a

Una vegata exposato tot esto, queda patent que ra solución a este proceso de precarización cheneralizato de ro sector educativo no ye una prioridat de ro gubierno autonomico, mas bien tot lo contrario. L’escayexito durant o curso y l’alcordato pa ro siguient no ye sino l’enesimo exemplo de ro suyo desinterés enta ra consecución d’uns servicios publicos de calidat y accesibles pa toz es miembros de ra clase treballadera. Dende ro PCTE exichimos que se guarencien unas condicions laborals dignas pa ro profesorato y que se dediquen a ra educación publica toz es recursos necesarios pa asegurar o present y ro futuro de ros estudiants. Animamos tamién a ro conchunto de ra comunidat educativa a fer valer es suyos intereses como sola guarencia pa construyir una nueva educación, una que sirva pa formar personas en o mas amplio sentito, y no pa que siamos piezas de ro suyo engranache d’explotación.