Este chueus, 25 de chulio, La Cara B de Uesca lanza ro suyo primer treballo discografico en formato E.P. “Rap de pueblo”.

As problematicas de ro mundo rural, o futuro de ro Pireneu aragonés y ra vida en es lugars protagonizan o primer treballo discografico de ro colectivo de hip-hop La Cara B de Uesca. O E.P., que sirve de carta de presentación pa este grupo altoaragonés, ye disponible dende este 25 de chulio en totas as plataformas dichitals y en formato fisico.

O treballo consta de nueu cortes: cuatro cancions y cinco pasaches, y conta con as ilustracions de Núria Auset en portada y contraportada, produccions d’AstonML y ras gaitas de Pablo Borderías.

“Rap de pueblo” contiene cuatro cancions: “Rap de pueblo”, una reivindicación de ro rap rural en contraposición a ra ideya que este estilo nomás se fa en es vicos de ras grans urbes, contrimostrando, a traviés de ra suya experiencia, que tamién se puede fer rap creixendo en o lugar; “A fiesta d’o lugar”, un homenache a ras plazas, as penyas, ros chamizos y toz es elementos que aconforman as fiestas de cualsequier lugar, dende ros capezutos encorriendo zagals dica ros yayos que bailan con a orquesta, pasando per es chóvens que saludan a ro sol dezaga de ra charanga; “Pirineos 2125”, una visión distopica d’un futuro ciberpunk en o Pireneu aragonés dó ras vals son controlatas per as grans corporacions y ras montanyas y lugars no son mas que parques d’atraccions en decadencia; y “Boira y lodo”, que ye un chilo cuentra tot y cuentra toz dó, con un ton mas animato, se repasa l’actualidat d’Aragón dende diferents puntos de vista.

Estas cuatro cancions vienen acompanyatas de cinco pasaches que contextualizan a ro grupo y a ro E.P: Una “Intro” que sirve de antesala con cortes de ros zaguers mandatarios aragoneses y ros suyos plans pa Aragón; “Plan Pirineos” y “La sociedad de la nieve”, que siguen profundizando en es plans que tienen es Gubiernos autonomicos con l’entorno natural en contraposición de ra voz d’Ismael, un de ros zaguers habitants de Mediano, lugar inundato per o entibo de ro mesmo nombre; y de ra man de “Muixordons” y “Outro” se podrá ascuitar a habitants de diferents zonas de l’Alto Aragón contando pasaches de ra vida en o lugar, l’exilio forzato per a construcción d’entibos, o ‘pan pa hue y fambre pa manyana’ que suposa vender lugars enters a ro turismo u ra vergüenya de ro “charrar malament”.

La Cara B de Uesca naxe en 2022 de ra unión de miembros de La Lefa Negra (Samianigo, 2001) y Frases Hechas (Binéfar, 2007) tratando, como en este E.P., tematicas que chiran arredol de ras problematicas que azotan a l’Aragón rural, como ra despoblación, es macro-prochectos que atentan cuentra l’entorno natural, a masificación turistica, ras pocas oportunidaz de ra choventut, u ra defensa de ro territorio y de ra cultura.

Vinclos d’interés

Canal de Youtube: https://www.youtube.com/@lacarabdeuesca

Perfil en Spotify: https://open.spotify.com/intl-es/artist/7Izlw45k71KyznqAvxC2BP?si=NSs53eGSSCyyG03XH3ogsg

Perfil en Instagram: https://www.instagram.com/lacarabdeuesca