Reproducimos contino ro comunicato de ro PCTE Aragón sobre ros fondos europeus pa la dichitalización en Aragón:

Durant es zaguers meses, o PCTE ha desarrollato cuantas analisis sobre ra Unión Europea y ixo que clamamos o “consenso europeísta”. Y ye que dillá de posibles contradiccions entre bels intereses de ros suyos países miembro (ye decir, entre ros monopolios d’ixos países), b’ha una serie de pilars con es cuals toz son d’alcuerdo. Un d’estos pilars ye ra transferencia de diners publicos a ro sector privato y ra busqueda de nuevos nichos de mercato. A clamata transición dichital encarna a ra perfección estos prencipios.

En o marco de ros fondos NEXTGENERATION, concebitos pa ra reconstrucción de ra economía europea -y publicitatos per o Gubierno como destinatos a ro “escudo social”-, s’establioron as aduyas pa ra transformación dichital de ras interpresas, prencipalment a traviés de subvencions pa ra transformación de ras PYMEs con o clamato Kit dichital. En total Aragón recibió 4,4 millons d’euros pa ra transformación de ra chicota y mediana interpresa, que engloba a ra gran mayoría de ras interpresas de ra comunidat.

Un anyo dimpués de ra implantación de ro Kit dichital y una vegata gastato ro presupuesto, pocas de ras interpresas continan o proceso de dichitalización per a suya cuenta y mantienen es servicios contratatos per o gran coste que suposan. A falta de resultatos oficials sobre ra transformación dichital y ro suyo mantenimiento, podemos dicir que va a tener muito poco impacto en as interpresas a ras cualas suposadament iba destinato. Será que s’ha planificato mal ixe Kit dichital? U no será que ixos fondos yeran destinatos en zaguera instancia a ras pochas de ros grans monopolios tecnolochicos?

Hemos d’haber en cuenta que ros diners salen de l’aportación que fa cada Estato miembro a ra UE y mas tardi se reembursan acompanyatos d’uns obchectivos. Ye, en definitiva, diners publicos que han servito pa activar o sector tecnolochico privato a traviés de ra venda de servicios subvencionatos pa interpresas. Ye paradoxal que se siga vendendo o mantra que ye l’interpresario ro que arrisga ra suya capital pa amillorar es suyos meyos de producción, cuan dende ra pandemia hemos visto como sistematicament es mecanismos de ro estato s’endrezan a un trespaso de diners publicos a intereses privatos, de vegata que s’augmenta ra explotación de ra clase obrera.

No nos entivoquemos: en o sistema capitalista ros desenrollos tecnolochicos y ra millora de ros meyos productivos no van enfilatos a amillorar as condicions de vida de ra nuestra clase, sino a un augmento de ros beneficios d’una minoría. En esto son toz d’alcuerdo. Pa fer-nos creyer que ye per o bien de toz, nos dicen que ra transición dichital amillorará ras nuestras vidas u que ro capitalismo verde aduyará a frenar o cambio climatico. Pero ra realidat ye que pa salir de ra crisi han creato nuevos mercatos y destinato millons y millons d’euros de ras nuestras pochas a ras interpresas privatas.

Entremistanto empiora ra calidat de vida de ra mayoría treballadera, perdemos poder adquisitivo y ra flexibilidat trascruza tot o mercato laboral fendo cada vegata mas difícil garra tipo de planificación vital. Esto ye lo que nos ofrex o capitalismo y en esto tamién son d’alcuerdo toz aquels que desfienden un sistema basato en a explotación y ra desigualdat.

Frent a ros monopolios y qui desfienden es suyos intereses, sían de ra color que sían, ye hora de confiar en as nuestras propias fuerzas y recuperar o nuestro propio camín. Ye hora de meter es intereses de ros y ras treballadoras en o centro, fendo que ros abances tecnolochicos y cientificos sirvan pa ro buen pasar de ra mayoría y no pa ro lucro d’uns pocos.