En lo que levamos d’anyo, s’han rechistrau 27 mullers  victimas mortals por violencia de chenero en l’estau espanyol.

Plegando l’estiu han puyau os casos, pero más amás en as zagueras dos semanas s’han multiplicau a saber-lo, estando asesinadas 10 mullers por sus parellas u exparellas, lo que ye bien alarmante.

Cinco d’istos asasinatos se producioron o zaguer cabo de semana. Han estau detenius
os feminicidas de Sabadell, Salou, Bunyol y Carabanchel; y el d’Alicant remató con a suya vida dimpués d’asasinar a la suya muller con una escopeta.

D’a resta d’as victimas, dos fuoron asasinadas en o País Valencià, dos en Catalunya y una en Madrit.

Dende lo ministerio d’igualdat, se ha prebau de reaccionar a ista situación. A ministra d’Igualdat, Ana Redondo, fació trobar-se al comité de crisis a prencipios d’iste mes pa analizar os zaguers asesinatos, y reconoció que bi ha un «problema» en o sistema de detección de casos de violencia de chenero. “amenistamos rechirar do se fan os fallos en a coordinación y cómo amillorar-la porque astí hemos detectau un problema”.

Amás, con a puyada de casos, a ministra se trobó la zaguer semana con o president de Canarias, Fernando Clavijo, “pa continar abanzando en a luita cuentra la violencia masclista”.

“Bi ha una programación ambiciosa pa creyar en todas as provincias y cabildos insulars centros de crisis, que han d’estar a disposición o 31 d’aviento”, apuntó la ministra.

En una man o gubierno y en l’atra l’oposición han pediu unidat pa luitar cuentra istos crimens, pero no ye prou verbalizar-lo, cal pasar enta l’acción.

Nerea Giménez Lardiés