En una declaración sobre ras recients esleccions presidencials en Irán y ra victoria de Masoud Pezeshkian, o Partito Tudeh subraya:

“O espectaclo de ras esleccions presidencials, que ro rechimen gubernant d’Irán asperaba ansiosament convertir en un gran aval a ro rechimen teocrático, remató con o boicot de ra mayoría de ra nación. Mesmo seguntes as estatisticas oficials, en cuantas ciudaz importants, incluyita ra capital, Teherán, a participación electoral tasament superó ro 30%. Seguntes ISNA, ro chefe de ra oficina electoral de ra provincia de Teherán dició: “O numero de votants esleyibles pa ra catorcena eslección presidencial estió de 10.199.742, y en esta eslección, o 25 de chunio, 3.366.264 papeletas estioron utilizatas en a capital.”

Yera claro que ra contina y grieu crisi economica y social, que poderba levar a ra sociedat a rafe d’unatra protesta cheneralizata a libel nacional como ro devantamiento popular “Muller, Vida, Libertat” u atras protestas succesivas como las de ros zaguers dos anyos, poderba desafiar seriosament a supervivencia de ro rechimen. Per ixo ros líders de ro rechimen yeran fundament preocupatos per o destín de ro suyo gubierno y ras serias dificultaz que enfrontinan pa mantener o suyo poder. Es actuals escaximientos rechionals, incluyito ro risgo d’un conflicto directo y desastroso con o Estato racista y criminal d’Israel y l’imperialismo estadounidenco, han de sumar-se a ras preocupacions de ros gubernants pa resaltar a profundidat de ra crisi que enfrontina ro rechimen, causata per as suyas propias politicas irracionals y aventureras.

Con a inasperata y ambigua muerte d’Ebrahim Raisi, miembro de ra comisión de ra muerte responsable de ro ixarrallón de milars de presoners politicos en 1988, o rechimen veyió una oportunidat pa reorganizar es suyos guardias y esbarrar o movimiento popular enta ra ilusión de ra “reformabilidat” de ro rechimen. Teneban a intención de crear una valvula de seguranza pa calmar a ra sociedat y safocar a crexent ira de ras masas.

A cualificación de Masoud Pezeshkian (que heba estato descualificato en dos esleccions presidencials anteriors y en a eslección parlamentaria mas recient) estió organizata y ordenata dreitament per o Líder Supremo. Esta medida teneba como obchectivo trayer a escena a reformistas afiliatos a ro Estato pa crear ilusions sobre Masoud Pezeshkian y chenerar falsas esperanzas d’una “finestra” de cambio, semellant a lo que se metió a preba durant a campanya electoral de Hassan Rouhani. Amás, una amplia propaganda y alarmismo sobre ra posibilidat de ra “eslección” de Jalili y l’empioramiento de ra situación en o país formaban parti d’una campanya precisa y organizata pa animar a ra chent a votar y crear un acto “heroico” inventato y retratar como un aval a ra popularidat, l’aprebación y ra ilusión de libertat de ro rechimen en un país asolato per a tiranía.

Jatami, que comprendendo ra profunda ira y l’odio de ro pueblo enta ro rechimen oportunista, s’heba abstenito de participar en o espectaclo de ras esleccions parlamentarias meses dinantes, tornó a escena esta vegata pa repetir y promover la ilusión de ra “finestra electoral”. A fes que, ra chent no ha ixuplidato que ro Sr.Jatami dició una vegata: “Si ros reformistas u beluns d’éls van a estar marguinatos, a opinión publica y mundial no importará. Lo important ye que aquels a qui no quieren no dentren, y soi seguro que no quieren que dentremos. Mesmo si pasamos esta etapa, no se nos permitirá ganar mas votos de ros cuals éls quieren”. Y ironicament, Masoud Pezeshkian, que en es suyos discursos anteriors enfatizó estar un “servidor de ro Liderato Supremo” y no tener autoridat pa realizar cambios fundamentals en muitas arias, en o suyo primer discurso dimpués de ras esleccions, confirmó l’avaluación de Jatami sobre ro proceso “electoral” en a Republica Islamica, dició: “Agradexco a ro Líder, perque sin él, es nuestros nombres no haberban salito facilment d’estas urnias”. Ali Jamenei tamién recordó a Pezeshkian, dimpués que s’anunciasen es resultatos de ras esleccions, que heba de continar o rumbo de Raisi.

Creando ilusions sobre ro gubierno de Pezeshkian pa calmar a situación y ras fayenas de ro movimiento popular

O gubierno de Masoud Pezeshkian, que ros suyos miembros clau serán examinatos per Ali Jamenei, y que ras suyas prencipals politicas economicas serán dictatas per a oficina de ro Líder Supremo a ro suyo gubierno y atras estructuras lechislativas y executivas, tendrá dos misions clau. Primero, calmar a un país grieument asolato per a crisi y crear a ilusión que lo rechimen ha triato ro curso de ras reformas. D’esta traza se privarba unatra explosión social, que esta vegata poderba implicar a poderosa presencia de ro movimiento obrero y poderba crear dificultaz insuperables pa ro rechimen. En segundo puesto, reprener as negociacions secretas con Estatos Unitos y la Unión Europea, qui implicitament expresoron a suya esperanza que ra suya eslección amillorase as relacions mutuas con Irán.

A experiencia de ros dos mandatos d’Hassan Rouhani en o poder, emparatos per es reformistas estatistas siguió un patrón semellant. Contrariament a ras promesas de campanya de Rouhani, l’arresto domiciliario de Mir-Hossein Mousavi, Zahra Rahnavard y Mehdi Karroubi no remató, eos presos de consciencia y eos presos politicos no estioron liberatos, no se privó ra brutal supresión de ros dreitos de ras mullers y ras demandas de ros treballadors y ra clase treballadera estioron ignoratos. A crisi economica continó, ra breca entre pobreza y riqueza s’enampló, ra corrupción gubernamental cheneralizata persistió y aumentó, y continó ra represión sangrienta y brutal de cualsequier protesta masiva, mesmo en 2017 y 2019. A ra fin de ro suyo mandato, Rouhani admitió que teneba poca autoridat y que yera simplament un executor de ras órdens de ro Líder Supremo, ro IRGC y ras fuerzas de seguranza.

O Partito Tudeh d’Irán creye que, antiparti d’una chicota minoría que participó en esta “eslección” y votó per Jalili, l’aclapadora mayoría de ra nación, incluyitos aquels que votoron per Masoud Pezeshkian con a esperanza d’una “finestra” pa ro cambio, s’esforzan per cambios fundamentals en o catastrofico estato actual de ro país y abanzar enta ro establimiento de ra voluntat de ro pueblo sobre ros afers. L’aclapadora mayoría de ra nación, especialment es treballadors y ra clase treballadera, que s’han visto cada vegata mas empentatos per debaxo de ro branquil de ra pobreza, quieren un alivio de ras aclapadoras presions economicas, salarios adecuatos compatibles con a inflación, a fin de ras extensas politicas neoliberals de privatización y de reducción de personal, a restauración de ra infrastructura productiva de ro país, a fin de ra brutal y inhumana agresión a ras mullers per parti de ros matons de ro rechimen, a libertat de ros personers politico-ideolochicos y una obridura de l’atmosfera politica en o país. Ye claro que garra d’estas demandas puede aconseguir-se dentro de ro rechimen teocratico y l’actual sistema politico despotico y antipopular. Es escaximientos de ros zaguers decenios han contrimostrato que nomás a traviés d’una luita social masiva y organizata se puede obligar a ro rechimen a retacular. O recient escaximiento historico en Francia, dó un amplio espectro de fuerzas progresistas, dende comunistas y socialistas dica verdas, s’unioron pa impedir a victoria de ras fuerzas de tendencia fascista de dreita, ye un sinyal claro y comprebata de ro poder de l’acción organizata y unita de ros progresistas y fuerzas amants de ra libertat, lo que se puede destacar en o caso d’Irán.

Una vegata mas, femos un clamau a totas as fuerzas patrioticas y amants de ra libertat de ro país a colaborar y preparar-se pa un dialogo nacional pa organizar a ras masas frustratas y desafiar seriosament a ro rechimen gubernant antipopular. Sin esfuerzos conchuntos y una luita organizata pa aconseguir cambios fundamentals y duraders, a Republica Islamica, como l’ha contrimostrato en es zaguers anyos, continará ra suya terrible vida, danyando a ro nuestro país meyant diversas maniobras y cambios de guardia.