O comunicato de guerra emitito dende Suiza per os EUA-OTAN de conchunta con es suyos prencipals aliatos en o mundo contra Rusia, presachia una intensificación de ro conflicto en Ucraína y fa encara mas visible ro periglo d’una conflagración cheneralizata.

A supuesta conferencia de paz estió un amalgama de menazas cuentra cualsequiera que dispute ra “seguranza” y “estabilidat” euroatlanticas, de conchunta con compromisos de ros EUA y ra OTAN pa un mayor emparo a Ucraína con diners y armas.

A no invitación de Rusia, l’ausencia de China y ra negativa de mas de 10 Estatos a sinyar o comunicato final (Arabia Saudita, India, Sudáfrica, Tailandia, Indonesia, Mexico, Emiratos Árabes Unitos, Brasil -participó como observador- etc.) amuestran a profunda polarización que ye provocando l’agudización de ros antagonismos imperialistas, en o trasfondo de ra confrontación entre ros EUA y China per a supremacía en o sistema imperialista mundial.

Suiza estió ro preludio de ra reunión de ra OTAN que se celebrará en Washington a primers de ro mes proximo do s’aspera que 32 países miembros decidan es proximos pasos d’escalada de ra confrontación contra Rusia y China.

A reunión estará una fita pa ra guerra a Ucraína ya que l’achenda incluyirá l’aumento de ro financiamiento de ro rechimen de Zelenski con a contribución d’Estatos-miembros de modo regular, l’enfortimiento de l’exercito ucrainián con nuevas armas modernas, l’ampliación de ros alcuerdos pa l’uso d’armas “occidentals” cuentra obchectivos en territorio ruso, ra misión de mas “entrenadors” a ros frents de guerra y ro ninvio a Ucraína d’avions de guerra.

Ya ra preparación belica ha pasato a unatro libel: s’aspera que mas de 20 miembros de ra OTAN cumplan este anyo l’obchectivo de l’alianza imperialista de destinar mas de ro 2% de ro PIB pa armamento, lo dople que fa 5 anyos.

En ixo contribuyió decisivament o desapegue de ro presupuesto militar de ra UE que l’anyo pasato plegó a ro maximo historico de 240 mil millons d’euros con una tendencia a l’alza encara mayor, mientres se confirma que Europa ya s’ha convertito en una “economía de guerra”.  Ye bien conoxito que ro nuestro país ye entre ros campions destinando firmement mas de ro 2% de ro PIB pa armamento que ye necesario pa ra OTAN.

Dende ros frents de guerra en Ucraína y en l’Oriente Medio, y de ras tensions que se son escalando en toz es rincons de ra planeta, destacando entre éls es Balcanes, o Pacifico, ro Cáucaso, Africa, etc., se ciernen as boiras d’un conflicto imperialista cheneralizato.

A politica criminal de ra OTAN en o terreno de rivalidaz insalvables con es demás cambos imperialistas, ye un factor d’inestabilidat y guerra que ye menazando a milars de millons de personas a tot o mundo, mientres que ros compromisos fráchils son cada vegata mas desafiatos.

A escalada de ras menazas de ra OTAN cuentra China tamién sinyala como de volátil en ye ra situación. O Secretario Cheneral de ra OTAN dreitament acusó China d’estar un emparo de Rusia en a guerra cuentra Ucraína y d’“alimentar o mayor conflicto armato en Europa dende ra Segunda Guerra Mundial”. De feto, menazó China con sancions economicas, que a ra suya vegata respondió a ra OTAN que no chitase “lenya a ro fuego”.

Esta ye ra situación actual fendo cuenta nomás es esdevenimientos de ras zagueras semanas. A traviés d’este prisma ro pueblo ha d’examinar es periglos de ra profunda implicación griega en es plans de ros EUA y ra OTAN y de feto dende posicions de primera linia, convertindo encara mas a ro nuestro pueblo en obchectivo.

D’astí viene ra responsabilidat que ro movimiento obrero-popular intensifique ra suya acción.