O pasato 28 de chunio, ra Plaza d’Espanya en Samianigo estió ro epicentro d’una multitudinaria concentración en cuentra de ras retalladas educativos que afectan a ro Viello Aragón. Organizata per as asociacions de mais y pais d’alumnos de ros colechios publicos de ra “provincia de Uesca”, ra mobilización reunió a cientos de personas que alzoron as suyas voces en defensa d’una educación digna y de calidat.

Motivos de ra protesta

A protesta estió motivata per a recient decisión de reducir o numero de mayestros en 138 plazas nomás en o territorio de ra “província de Uesca”, una medida que l’organización considera una violación de ros dreitos educativos de ro estudiantato. As asociacions de mais y pais, de conchunta con diversos colectivos socials y educativos, han subrayato que estas retalladas afectan dreitament a calidat de ra ensenyanza y ro futuro de ra choventut de ra rechión.

As retalladas tamién afectan particularment a ro Colechio Rural Agrupato (CRA) Alto Galligo, ubicato en as localidaz de Biescas, Sallent de Galligo, Pandicosa y Tramacastiella de Tena, do se preveye ra perda de cuatre mayestros pa ro proximo curso escolar. Esta reducción implica un aumento en as ratios d’alumnato per clase, ra eliminación d’aulas y ra necesidat de chuntar a alumnato de diferents edaz baxo un solo tutor, lo que deteriora ra calidat educativa.

Es manifestants portiaban pancartas y coriaban lemas en defensa de ra educación publica, enfatizando ra necesidat de mantener una plantilla de docents adecuata que pueda guarenciar una formación de calidat. Entre ros asistents se trobaban mais, pais, estudiants, profesors y ciudadans compromesos con a causa, toz unitos per un obchectivo común: revertir as retalladas y asegurar un sistema educativo chusto y equitativo.

Discursos y testimonios

Durant a concentración, cuantos representants de ras asociacions de mais y país expresoron a suya indignación y preocupación. Es suyos discursos resaltoron no nomás o impacto immediato de ras retalladas, sino tamién as consecuencias a largo plazo pa ra comunidat. “No podemos permitir que se chugue con o futuro de ros nuestros fillos. A educación ye un dreito fundamental y hemos de luitar per preservar-lo”, afirmó un de ros portavoces.

Tamién s’ascuitoron testimonios de docents que compartioron as suyas experiencias y ra dificultat d’ofrir una educación de calidat en condicions cada vegata mas precarias. A reducción de r personal docent no nomás incrementa a carga de treballo de ros mayestros, sino que tamién disminuye l’atención personalizata que l’alumnato amenesta pa desenvolver-se plenament.

L’AMPA de ro CRA Alto Galligo emitió un comunicato dirichito a ra Consellera d’Educación, Claudia Pérez, y a ro president de ro Gubierno d’Aragón, Jorge Azcón, destacando ra importancia de mantener un sistema educativo robusto en as zonas rurals pa fixar población y privar a marcha de familias en busca d’una educación millor pa ros suyos fillos.

Repercusions y proximos pasos

A concentración en Samianigo estió parte d’una serie de mobilizacions que se levoron a cabo simultaniament en atras localidaz, totas ellas endrezatas a presionar a ras autoridaz pa que reconsideren a suya decisión. A respuesta de ra comunidat ha estato contundent, evidenciando un amplio refús a ras medidas de retallada y un fuerte compromiso con a defensa de ra educación publica.

A resultas d’estas mobilizacions, s’aspera que ras autoridaz educativas revalúen as retalladas y busquen solucions que no perchudiquen a l’estudiantato ni a ra calidat de ra ensenyanza. As asociacions de mais y pais han anunciato que continarán con as suyas accions de protesta y mantendrán un dialogo constant con as autoridaz pa asegurar que ras suyas demandas sían ascuitatas y atenditas.

A concentración de ro 28 de chunio en Samianigo ha estato un claro exemplo de ra importancia de ra mobilización obrera y popular en a defensa de dreitos fundamentals como ra educación. L’amplia participación y ra fervor contrimostrato per es asistents son un sinyal inequivoco que ra comunidat de ro Viello Aragón no ye disposata a acceptar retalladas que comprometan o futuro de ros suyos fillos. A luita per una educación digna y de calidat contina, y ra sociedat ye mas unita que nunca en este proposito.